Einar S. Hálfdánarson, faðir Diljár Mistar, þingkonu Sjálfstæðisflokksins og formanns utanríkismálanefndar Alþingis, var einstaklingurinn sem lagði fram kærði baráttukonurnar Maríu Lilju Kemp Þrastardóttur og Semu Erlu Serdaroglu til lögreglu vegna fjársöfnunar Solaris-samtakanna. Þetta kemur fram í umfjöllum Samstöðvarinnar en féið sem hefur safnast hefur verið nýtt til björgunar Palestínufólks frá Gaza-svæðinu.
Eins og Morgunblaðið greindi frá í morgun hefur Lögreglustjórinn á höfuðborgarsvæðinu framsent kæruna til héraðssaksóknara en hin meintu brot geta varðað allt að þriggja ára fangelsi.
„Söfnunin er klárt brot á lögum um opinberar fjársafnanir. Til að mynda er ekki unnt að halda nákvæmt reikningshald yfir söfnunarfé og öll útgjöld fyrir fjársöfnunina. Né heldur að endurskoða reikningshaldið af löggiltum endurskoðanda eða þeim er sýslumaður kann að útnefna til slíks, svo hið augljósa sé nefnt,“ segir í kærunni sem Morgunblaðið hefur undir höndum.
En í henni er því einnig haldið fram að aðgerðir Maríu Lilju og Semu Erlu virðast stangast á við lög um aðgerðir gegn peningaþvætti og fjármögnun hryðjuverka.
Samstöðin greindi svo frá því fyrir stundu að Einar væri maðurinn á bak við ákæruna en miðillinn hefur sömuleiðis komist yfir afrit af kærunni. Hefur miðillinn eftir ónefndum lögmanni að um „pólitískar ofsóknir sé að ræða“.
Einar hefur látið sig málefni Ísraels og Palestínu nokkuð varða. Í nóvember síðastliðnum skrifaði hann harðort opið bréf í Morgunblaðið þar sem hann fordæmdi yfirlýsingu fjórða hundrað starfsmanna Háskóla Íslands til stuðnings Palestínu en yfirskrift greinarinnar var Gyðingaofsóknir endurvaktar – eftir skamman svefn – með yfirlýsingu starfsfólks HÍ.
