Í fræðigrein í nýjasta tölublaði Læknablaðsins kemur fram að MDMA, sem almennt er þekkt sem fíkniefni sem notað er ekki síst við skemmtanahald til að kalla fram ánægjuvímu, geti nýst sem liður í samtalsmeðferð við áfallastreituröskun.

Greinina rita Helga Þórarinsdóttir geðlæknir, Berglind Gunnarsdóttir sálfræðingur og Engilbert Sigurðsson geðlæknir.

Í ágripi greinarinnar segir að MDMA hafi lengi verið rannsakað sem liður í samtalsmeðferð við áfallastreituröskun, geðröskun þar sem fá lyf hafi sýnt fram á virkni og brottfall úr meðferð sé umtalsvert. í greininni sé farið yfir stöðu þekkingar á meðferð við áfallastreituröskun og notkun MDMA í samsettri meðferð við röskuninni.

Meðferð með MDMA sé viðbótarmeðferð samhliða samtalsmeðferð sem sé annars konar en þær samtalsmeðferðir sem nú teljist gagnreyndar við áfallastreituröskun. Meðferðin felist í fræðslu fyrir gjöf MDMA í tvö til þrjú skipti samhliða stuðningi tveggja meðferðaraðila í allt að 8 klukkustundir og í kjölfarið allt að 9 eftirfylgdarsamtölum. Slík notkun MDMA sé talin minnka tilfinningalegt uppnám í tengslum við upprifjun áfalla og auðvelda þannig úrvinnslu þeirra. Nýleg safngreining hafi sýnt að MDMA-gjöf samhliða slíkri samtalsmeðferð hafi dregið meira úr einkennum áfallastreitu en sama samtalsmeðferð án MDMA-gjafar.

Loks segir í ágripi greinarinnar að nýlegar rannsóknir styðji að gjöf MDMA samhliða samtalsmeðferð dragi úr einkennum áfallastreitu og þolist almennt vel. Slíkar rannsóknir séu forsenda þess að MDMA geti hlotið markaðsleyfi sem liður í samsettri áfallastreitumeðferð á næstu árum. Brýn þörf sé síðan á samanburði þessarar samsettu meðferðar við gagnreyndar samtalsmeðferðir við áfallastreituröskun með og án MDMA.

Greinina í heild er hægt að nálgast hér.