Salvör Nordal umboðsmaður barna hefur sent frá sér umsögn um frumvarp til breytinga á lögum um útlendinga sem nú er til meðferðar á Alþingi. Umsögnin varðar ákvæði frumvarpsins um fjölskyldusameiningu en Salvör segir þau ekki samræmast Barnasáttmála Sameinuðu þjóðanna sem lögfestur hefur verið hér á landi.
Salvör vísar í umsögninni til ákvæða frumvarpsins um að aðstandendur útlendinga sem fengið hafi viðbótarvernd eða mannúðarleyfi á Íslandi öðlist ekki rétt til fjölskyldusameiningar fyrr en að minnsta kosti tveimur árum eftir veitingu viðbótarverndar eða mannúðarleyfis enda hafi sá aðili þá fengið sitt dvalarleyfi endurnýjað.
Salvör minnir á að samkvæmt Barnasáttmálanum sem lögfestur hafi verið á Íslandi 2013 beri að afgreiða beiðni barns eða foreldris þess um að koma til eða fara frá aðildarríki vegna endurfunda fjölskyldu með jákvæðu hugarfari, mannúðlega og með skjótum hætti. Hún segir Barnaréttarnefnd Sameinuðu þjóðanna leggja áherslu á að umsóknir um fjölskyldusameiningu séu afgreiddar á slíkan hátt og að sérstaklega skuli stuðla að sameiningu barna og foreldra.
Því sé það hennar mat að þær breytingar sem lagðar séu til í frumvarpinu hafi þær afleiðingar að tefja fyrir fjölskyldusameiningu og samræmist því ekki ákvæðum Barnasáttmálans.
Salvör segist meðvituð um að munur sé á alþjóðlegri vernd og viðbótarvernd. Hið fyrrnefnda lúti að aðstæðum þeirra einstaklinga sem eigi í hlut en hið síðarnefnda að almennu ástandi í heimaríki viðkomandi. Ákvæði frumvarpsins um fjölskyldusameiningu hafi verið rökstudd með þeim því að viðbótarvernd og mannúðarleyfi sé ætlað að mæta tímabundnum aðstæðum og því sé lagt til að slíkt veiti ekki rétt til fjölskyldusameiningar fyrr en eftir tvö ár.
Salvör segir að lokum í umsögn sinni að þessi rök breyti því ekki að réttur barna til fjölskyldusameiningar sé sá sami hvort sem dvalarleyfi byggi á alþjóðlegri vernd, viðbótarvernd eða vernd á grundvelli mannúðarsjónarmiða. Það sé ekki í samræmi við 2. grein Barnasáttmálans að takmarka rétt tilgreindra hópa barna til fjölskyldusameiningar.
