Tvítugur maður að nafni Jaguar Do var á föstudag sakfelldur fyrir hnífstungu í Grafarholti föstudagsmorguninn 24. nóvember 2023.
Málið vakti óhug á sínum tíma en DV greindi fyrst frá árásinni nokkrum klukkustundum eftir atburðinn. Var töluverður viðbúnaður lögreglu á vettvangi og meðal annars einni götu lokað, Reynisvatnsás.
Í ákæru héraðssaksóknara kom fram að hinn ákærði hafi ráðist á þolandann, sem einnig er karlmaður, fyrir utan íbúð og síðan elt hann uppi þegar hann hljóp í burtu og stungið hann margsinnis með hníf.
Voru afleiðingarnar þær að þolandinn hlaut 2-2,5 sentímetra stungusár aftanvert á vinstri brjóstkassa yfir herðablaði. Einnig 2,5 sentímetra stungusár framanvert á hægri brjóstkassa og síðu yfir rifjabarðinu skáhallt niður frá geirvörtu og beint neðan undan fremri fellingu holhandar (handarkrika) yfir lifrarsvæði. Þriðji skurðurinn var djúpur neðanvert á vinstri framhandlegg niður undan olnboga og fór að hluta til í gegnum sinar og sinafell þannig að réttisin olnboga var tekin í sundur að hluta og djúpt inn í vöðvann. Loks hlaut þolandinn skurð á vinstri baugfingri þar sem stór hluti gómsins skarst af lófamegin.
DV greindi einni frá því þann 15. febrúar síðastliðinn, og byggið á gæsluvarðhaldsúrskurði yfir árásarmanninum, að lögreglukona á frívakt hefði orðið vitni að atvikinu og tekið ljósmyndir af því. Segir svo frá því í úrskurðinum:
„Að morgni föstudagsins 24. nóvember sl. bárust lögreglu upplýsingar um að brotaþoli hafi komið á slysadeild með leigubifreið með stungusár. Þá fékk lögregla einnig þær upplýsingar að lögreglukona á frívakt hafi orðið vitni að árásinni. Samkvæmt framburði lögreglukonunnar var hún að aka út af bifreiðastæði við […], þegar hún sá þrjá menn veitast að manni sem lá á miðri götunni við […] og […]. Hún ók upp að þeim og hafði afskipti af þeim og létu mennirnir þá af háttseminni. Lýsti hún mönnunum þannig að einn hafi verið lágvaxinn og af asísku bergi brotinn, annar var hávaxinn með svarta eyrnalokka og sá þriðji var í áberandi hvítum, svörtum og grængulum jakka. Hún tilkynnti mönnunum að hún væri lögreglumaður og ætlaði að tilkynna málið, en þá hljóp sá lágvaxni af vettvangi, en hún náði ljósmynd af hinum tveimur.“
Einnig kemur fram í úrskurðinum að árásarþolinn fór á bráðamóttökuna með leigubíl sem hann hafði hringt á og var gert að sárum hans. Var hann með um tveggja og hálfssentimetra djúpt stungusár á vinstri síðu yfir rifjabarði skáhalt niður að geirvörtu yfir brjóstholi.
Nokkrar manneskjur voru handteknar í kjölfar atburðarins en þeim var síðan öllum sleppt fyrir utan tvo grunaða í málinu. Annar þeirra, Jaguar, játaði á sig árásina. Hann hefur lýsti þvví í yfirheyrslum lögreglu að brotaþoli hafi komið í samkvæmi til að selja kókaín. Sagðist hann hafa kvartað undan því að efnið væri ekki gott og í kjölfarið fóru þeir að rífast. Átökin mögnuðust síðan og lauk með fyrrgreindum hætti.
Sem fyrr segir játaði ákærði verknaðinn í yfirheyrslum lögreglu eftir atvikið. Fyrir dómi neitaði hann sök eins en játaði þó að hafa viðhaft þá háttsemi sem lýst er í ákæru. Hins vegar hljóðar ákæran upp á tilraun til manndráps og neitar ákærði því.
Verjandi mannsins kom með ábendingu um að dómurinn kannaði hvort játningin hefði verið fölsk að hluta eða öllu leyti. Þess skal getið að ekki fór fram DNA-rannsókn á hníf sem haldlagður var við rannsókn málsins og lagði ákæruvaldið til grundvallar að vopnið sem beitt var í árásinni hefði ekki fundist. Ákæruvaldið tók ekki undir ábendingu um könnun á falskri játningu og sagði málshöfðunina gegn manninum reista á traustum grundvelli. Dómari féllst ekki á að ástæða væri til að ætla að játning mannsins hefði verið fölsk en aðstæður voru þannig að möguleiki var á því að annar aðili hefði framið árásina. Hinn ákærði og aðrir sem voru handteknir vegna árásarinnar höfðu tækifæri til að ráða ráðum sínum um atvikin því handtökur áttu sér ekki stað fyrr en tveimur sólarhringum eftir árásina. Dómari taldi hins vegar ekkert hafa komið fram sem benti til að maðurinn hefði verið látinn taka á sig sök auk þess sem játning hans færi saman við fyrstu frásögn brotaþolans af atvikinu.
Við ákvörðun refsingar var litið til þess að hinn ákærði væri ekki í sterkri félagslegri stöðu. Skólaganga hans eftir grunnskóla er takmörkuð og býr hann á heimili móður ásamt systkinum, að því er kemur fram í dómnum. Einnig var metið til refsilækkunar að samkvæmt sakavottorði hefur hann ekki áður gerst brotlegur við lög, sem og að maðurinn játaði sekt að hluta.
Var niðurstaðan tveggja ára fangelsi. Hann var einnig dæmdur til að greiða brotaþolanum 1,5 milljónir króna í miskabætur.
Dóminn má lesa hér.
