Vísindamenn í Bandaríkjunum hafa komist að því að bandormsegg sem fundust í heila sjúklings hafi komist þangað vegna þess að hann innbyrði vaneldað beikon.
Breska fréttastofan Sky News greinir frá þessu.
Maðurinn, sem er 52 ára gamall, fann fyrir miklum hausverkjum og leitaði til læknis. Taldi hann að um mígreni væri að ræða en læknum fannst tilfellið vera óvenjulegt. Hausverkjunum fjölgaði stöðugt og þeir ágerðust. Þá brást maðurinn ekki við neinni lyfjameðferð. Vildu læknarnir því gera frekari rannsóknir og sem betur fer.
Þegar höfuð mannsins var myndað kom í ljós fjöldi bandormseggja í heilanum. Var hann loks greindur með sýkingu sem kallast neurocysticerocis en hún kemur úr bandormi sem heldur til í vöðvum svína. Skrifuð var grein upp úr rannsókninni í tímaritið American Journal of Case Reports.
Maðurinn hafði ekki ferðast til neinna landa þar sem mataröryggi er oft ábótavant. Þá neitaði hann að hafa borðað hráan mat eða mat úr matvögnum. Hann hins vegar viðurkenndi að gæða sér reglulega á lítið elduðu beikoni. Telja vísindamennirnir að þarna sé skýringin komin. Vaneldað beikon og skortur á handþvætti hafi valdið þessu.
Manninum var gefið ormalyf og bólgueyðandi lyf og hjöðnuðu verkirnir þá. Að sögn vísindamannanna er mjög óvanalegt að fólk í Bandaríkjunum sýkist af þessum bandormi.
