Lögreglan á höfuðborgarsvæðinu hefur lokið rannsókn á tengslum sorphirðumanna við tvö innbrot á Álftanesi. Engin tengsl hafa fundist.
Þetta staðfestir Helgi Gunnarsson, lögreglufulltrúi á lögreglustöðinni í Hafnarfirði við DV. „Þeir hafa engin tengsl við nein innbrot,“ segir Helgi.
Aðspurður um hvort búið sé að upplýsa innbrotin tvö, sem framin voru við Túngötu á Álftanesi segir Helgi svo ekki vera.
„Við erum fullviss um það að það séu engin tengsl þarna á milli,“ segir hann.
DV greindi frá því í morgun að málið væri til skoðunar hjá lögreglu. Mikil umræða hefur spunnist á samfélagsmiðlum um hugsanleg tengsl sorphirðumanna.
Lýsa íbúar því að þeir hafi sést kíkja á glugga og fara inn í garða og palla. Þegar komið hefur verið að þeim hafi þeir orðið mjög vandræðalegir. Höfðu sumir íbúar áhyggjur af því að sorphirðumennirnir væru að skanna svæði fyrir innbrotsþjófa.
Jón Þórir Frantzson, forstjóri Íslenska gámafélagsins, sagði að þessi umræða dúkkaði stundum upp. Fyrirtækið reyndi að koma þeim skilaboðum til starfsmanna sinna hvaða hegðun sé ekki leyfileg því freistandi væri fyrir þá að stytta sér leið í gegnum garða. Skoðun fyrirtækisins hefði hingað til hins vegar ekki sýnt nein tengsl sorphirðumanna við innbrot.
