Saltkjöts og baunahlaðborð Íslendinga á Alicante á Spáni endaði með ósköpum í gær. Sumir gestir tróðu svo í sig saltkjöti og laumuðu með sér heim þannig að ekki var til nóg fyrir alla. Þurfti að endurgreiða um fjórðungi gesta vegna þess að saltkjötið var búið.
Íslendingarnir Amanda og Gummi leigðu veitingastaðinn La Fiorentina á Alicante, ásamt starfsfólki og tónlistarmanni til þess að bjóða upp á saltkjöt og baunir á sprengidaginn. En þau hafa staðið fyrir ýmis konar viðburðum fyrir Íslendinga á svæðinu
Mikil spenna var fyrir viðburðinum og uppselt. Miðarnir voru í kringum 80 talsins. Hins vegar kom í ljós að oft er misjafn sauður í mörgu fé og hjá sumum tók græðgin völdin.
Gert var ráð fyrir 480 grömmum af saltkjöti á hvern einstakling, sem er vel í látið. Sumir ofhlóðu svo á diskana svo að ekkert varð eftir fyrir fjórðung gesta, um 20 manns. Þurfti því að endurgreiða þeim miðana sem þýddi að viðburðurinn kom út í tapi.
Í færslu sem einn gesturinn deilir segir að fólkið sem kom fyrst að borðinu hafi mokað margt rúmu kílói af saltkjöti á sinn disk, tvöfalt meira en gert var ráð fyrir.
„Fólk fór aftur og aftur og fékk sér ábót áður en aðrir komust sína fyrstu ferð að hlaðborðinu,“ segir gesturinn. „Margir fóru snemma af staðnum með sjálftekið kjöt í álpappír, pinklum og töskum. Það var tekið eftir ykkur.“
Segir hann bersýnilega hafa komið í ljós að fólk kunni sig ekki á hlaðborðum. Græðgin og tillitsleysið hafi verið algjört.
„Þetta sama fólk fór snemma af staðnum enda þurfti það að komast heim til að leggja sig eftir ofátið!“ segir hann. „Menn fengu sér rúmt kíló á diskinn í fyrstu ferð. Ekkert meðlæti. enga súpu. Þetta er villimannsbragur á hlaðborði.“
Í annarri færslu segir Amanda viðburðahaldari ekki hafa orðið vitni að þessu framferði gestanna. En henni þætti mjög vænt um að þau yrðu upplýst um hvaða fólk hefði gert þetta.
