Fundað er stíft í Reykjanesbæ vegna þeirrar stöðu sem er að teiknast upp vegna eldgossins norðan við Grindavík. Það er að hraun gæti runnið yfir og skemmt heitavatnslögnina til Suðurnesja og heitavatnslaust orðið á öllu svæðinu.
„Við erum að fylgjast með stöðunni eins og aðrir. Aðgerðarstjórn verið að störfum síðan þessi atburður hófst og við erum að virkja okkar eigin neyðarstjórn sem mun koma til með að halda utan um upplýsingagjöf til íbúa og starfsfólks,“ segir Halldóra Fríða Þorvaldsdóttir, formaður bæjarráðs Reykjanesbæjar.
Þegar þessi frétt er skrifuð er fundur með Almannavörnum í gangi og Reykjanesbær með sinn fulltrúa inni á honum. Hann upplýsir bæjaryfirvöld samstundis eftir því sem fram vindur. Bæjarstjórn kemur síðan þeim upplýsingum áfram til íbúa, sem og aðrar mikilvægar upplýsingar eins og frá Veitum.
Halldóra segir að viðbragðsáætlanir séu í gildi fyrir hvað sem getur komið upp. Þær séu einnig uppfærðar eftir því sem þurfa þykir.
Verið er að reyna að verja lögnina með því að moka yfir hana sandi þannig að hraunið flæði vonandi yfir hana ef það kemst svo langt. Þá er einnig verið að vinna að hjálögn til að tryggja flæðið.
Páll Erland forstjóri Veitna hefur lýst því yfir að hugsanlegt sé að heitavatnslaust verði á Suðurnesjum í einn eða tvo sólarhringa.
Hafa ber þó í huga að samkvæmt veðurspá er áfram búist við miklu frosti bæði í nótt og á morgun, allt að 11 gráðum í Reykjanesbæ klukkan 7:00 í fyrramálið. DV hefur upplýsingar um að íbúar í Reykjanesbæ séu sumir þegar farnir heim til að hlúa að húsum sínum í ljósi yfirvofandi hættu.
„Ja, hvenær er góður tími til að missa heitt vatn úr húsum,“ segir Halldóra aðspurð um hvort að þessi vá sé ekki að koma á versta tíma. „Við sendum upplýsingar til íbúa um hvernig best sé að bera sig að til að halda varma á húsum. Síðan verðum við að skoða það með stofnununum okkar hvort það tekst að halda starfseminni gangandi og hvaða ráðstafanir þurfi að gera.“
Hugsanlegt er að það þurfi að loka einhverjum starfsstöðvum.
