Lögreglustjórinn á Suðurnesjum hefur ákært litháískan mann á fertugsaldri fyrir að hafa stolið 95 kartonum af sígarettum úr Flugstöð Leifs Eiríkssonar. Það gera samtals 19 þúsund sígarettur.

Ekki tókst að birta manninum ákæruna og var því birt fyrirkall í Lögbirtingablaðinu.

Maðurinn er kvaddur fyrir dóm til að hlýða ákæru, halda uppi vörnum og sæta dómi í Héraðsdómi Reykjaness. Málið verður tekið fyrir miðvikudaginn 28. febrúar næstkomandi.

Er hann sakaður um að hafa tekið 95 karton af sígarettum í Fríhöfninni og gengið með þau út án þess að greiða fyrir. Þetta á hann að hafa gert á tímabilinu 8. til 11. febrúar á síðasta ári.

Verðmæti tæp 800 þúsund

Verðmæti sígarettanna er metið á 770.405 krónur samkvæmt fyrirkallinu. Fríhöfnin gerir einkaréttarkröfu um að fá þessa peninga til baka, auk vaxta og málskostnaðar. Lögreglustjórinn gerir kröfu um að hann verði dæmdur til refsingar og greiðslu alls sakarkostnaðar.

Mæti hann ekki fyrir dóminn verður litið á það svo sem hann viðurkenni brotið og verður málið þá dómtekið að honum fjarstöddum.