„Þrenging gatnamóta Sæbrautar-Kleppsmýrarvegar er líklega hluti af þeirri stefnu meirihluta borgarstjórnar að skapa sem víðast öngþveiti í umferðinni,“ segir Kjartan Magnússon, borgarfulltrúi Sjálfstæðisflokksins.
Kjartan skrifar grein í Morgunblaðið í dag og segir að ófremdarástand hafir ríkt á gatnamótum Sæbrautar og Kleppsmýrarvegar um margra mánaða skeið þar sem þau anna hvorki mikilli umferð frá atvinnuhverfinu austan Sæbrautar né ört vaxandi íbúðabyggð þar.
„Sú ákvörðun Reykjavíkurborgar, að þrengja gatnamótin og fækka vinstribeygjuakreinum af Kleppsmýrarvegi inn á Sæbraut til suðurs, leiðir til mikilla tafa og hefur mjög slæmar afleiðingar fyrir umferð um þessi fjölförnu gatnamót.“
Brýnt að leiðrétta þessi mistök
Í grein sinni segir hann brýnt að leiðrétta þessi mistök sem fyrst og fjölga áðurnefndum vinstribeygjuakreinum í tvær á ný. Um leið þurfi að tryggja öryggi skólabarna og annarra gangandi vegfarenda á leið yfir Sæbraut með sérstökum aðgerðum.
„Umrædd gatnamót eru helsta tenging vegakerfisins við atvinnuhverfið austan Sæbrautar, sem er eitt mikilvægasta atvinnu- og þjónustuhverfi landsins. Fjöldi fólks sækir daglega atvinnu eða þjónustu til þeirra fjölmörgu fyrirtækja sem þar eru starfrækt. Þar eru vinsælar byggingavöruverslanir, verkstæði og nýsköpunarfyrirtæki svo eitthvað sé nefnt. Þar er einnig stærsta innflutningshöfn landsins ásamt vöruhúsum og vöruflutningamiðstöðvum. Fjölmennt íbúðahverfi hefur að undanförnu sprottið upp í Vogabyggð, sem eykur enn á umferðina um svæðið, sem þó var mikil fyrir,“ segir hann.
Kom forsvarsmönnum fyrirtækja á óvart
Kjartan bendir einnig á að á hverjum degi fari fjöldi vöruflutningabifreiða úr hverfinu með vörur sem dreift er um höfuðborgarsvæðið og allt land. Hverfið sé því mikilvægur innviður og ómissandi hlekkur í vöruflutningakerfi landsins.
„Svo mikilvægt atvinnuhverfi verður að vera vel tengt við stofnbrautir og þjóðvegi. Gatnamót Sæbrautar og Kleppsmýrarvegar eru ein helsta tenging hverfisins við vegakerfið og um þau fer stór hluti vöruinnflutnings landsmanna.“
Kjartan segir að það hafi komið forsvarsmönnum fyrirtækja á svæðinu spánskt fyrir sjónir þegar þeir sáu í fréttum í fyrra að til stæði að fækka beygjuakreinum af Kleppsmýrarvegi yfir á Sæbraut úr tveimur í eina. Kom þetta þeim á óvart, ekki síst í ljósi þess að umræddar tvær beygjuakreinar önnuðu vart umferð af Kleppsmýrarvegi inn á Sæbraut og kannski sérstaklega eftir að umferð íbúa úr hinu nýja Vogahverfi bættist við.
„Fyrirtækin brugðust skjótt við, höfðu samband við Reykjavíkurborg og komu því skýrt á framfæri að þrenging gatnamótanna myndi hafa mjög neikvæð áhrif á starfsemi fyrirtækjanna á svæðinu. Jafnframt var óskað eftir því að borgin hefði samráð við fyrirtækin um málið áður en ráðist yrði í framkvæmdir. Borgin hét samráði en réðst þó í þrengingu gatnamótanna í haust án samráðs og síðan hefur ríkt þar ófremdarástand,“ segir hann.
Stefna að skapa öngþveiti?
Hann segir að borgarfulltrúar Sjálfstæðisflokksins hafi lagt til í október síðastliðnum að vinstribeygjuakreinum af Kleppsmýrarvegi, inn á Sæbraut til suðurs, yrði fjölgað í tvær á nýjan leik. Jafnframt yrði öryggi gangandi vegfarenda á leið yfir Sæbraut aukið, til dæmis með hnappastýrðu og/eða snjallstýrðu gangbrautarljósi.
„Lögðum við þannig til leiðréttingu á þeim mistökum sem voru gerð með þrengingu gatnamótanna. Tillagan var felld með fjórum atkvæðum meirihluta Samfylkingar, Framsóknarflokks, Pírata og Viðreisnar, gegn tveimur atkvæðum Sjálfstæðisflokksins, á fundi umhverfis- og skipulagsráðs Reykjavíkur, 29. nóvember síðastliðinn,“ segir Kjartan sem er ómyrkur í máli.
„Greinilegt er að vinstri meirihlutinn telur engin mistök hafa verið gerð með þrengingu gatnamóta Sæbrautar og Kleppsmýrarvegar, sem leitt hefur til mikilla umferðartafa og óviðunandi tengingar heils atvinnuhverfis við vegakerfi landsins. Umrædd þrenging er því líklega hluti af þeirri skýru stefnu meirihlutans að skapa sem víðast öngþveiti í umferðinni.“
