Lögreglan á höfuðborgarsvæðinu greindi frá því fyrr í dag á Facebook-síðu sinni að innbrotahrina sé yfirstandandi í umdæminu:

„Þessa dagana stendur yfir innbrotahrina á öllu höfuðborgarsvæðinu. Aðferðin sem núna er hvað mest áberandi er að farið sé inn í hús og bifreiðar sem eru ólæst, það er nánast eins og að bjóða þjófum inn. Það er góð regla að geyma aldrei verðmæti í bílum, það gerir ekkert annað en að freista þjófa.“

Lögreglan varpar því fram leiðbeiningum um heppileg viðbrögð og ráðstafanir sem hún hvetur fólk til að grípa til vegna þessa ástands.

„Muna að læsa íbúðarhúsnæði, bílum og atvinnuhúsnæði til að gera það besta til að forðast innbrot. Innbrotin eiga sér stað á öllum tíma sólarhringsins, ekki bara á nóttunni. Gott er að gera viðeigandi ráðstafanir ef íbúðarhúsnæði er yfirgefið um lengri tíma, t.d. að óska eftir því að nágrannar líti til með húsnæðinu. Lögreglan á höfuðborgarsvæðinu leggur mikla áherslu að upplýsa öll þessi mál og hefur þegar sett í gang aðgerðir til að stöðva þessa hrinu. Ef fólk verður vart við grunsamlegar mannaferðir er um að gera að hafa samband við lögreglu í síma 112.“

Þess ber að geta að í upphaflegri útgáfu færslunnar var orðið innbrotahrina notað en orðalaginu hefur nú verið breytt.