Þingfesting ákæru vegna morðsins á Bartlomiej Kamil Bielenda fór fram í Héraðsdómi Reykjaness í dag í lokuðu þinghaldi. Var það ákvörðun Jónasar Jóhannssonar dómara vegna ungs aldurs sakborninganna. Aðalmeðferð fer fram í haust og verður hún jafnframt fyrir luktum dyrum. Segir Jónas það gert að kröfu foreldra sakborninganna þriggja.
Þrír drengir á aldrinum 17 til 19 ára eru ákærðir fyrir að hafa banað Bartlomiej Kamil Bielenda á bílastæðinu við Fjarðarkaup þann 20. apríl og sautján ára stúlka er ákærð fyrir brot á hjálparskyldu. Bartlomiej var 27 ára og átti eina tveggja ára dóttur.
Sakborningar mættu fyrir dóminn í dag þar sem þeim var gert að taka afstöðu til sakarefnis, en þar sem þinghaldið var lokað er ekki vitað hver afstaða þeirra er.
Ofsafengin líkamsárás og lýsingar nákvæmar
Í ákæru eru drengirnir þrír ákærðir fyrir manndráp, en lýsing á árásinni er mjög nákvæm í ákærunni og samkvæmt lýsingu virðist árásin hafa verið ofsafengin.
Eru drengirnir sagðir hafa umkringt Bartlomiej á bílastæðinu við Fjarðarkaup í Hafnarfirði. Sá elsti drengjanna hafi hrint honum í jörðina og annar drengur síðan sparkað í maga Bartlomiej þar sem hann lá í götunni. Sá elsti drengjanna er síðan sagður hafa hótað að stinga Bartlomiej með hníf í hálsinn og síðan stappað og sparkað í höfuð hans.
Saksóknari segir að Bartlomiej hafi náð að standa upp eftir þessar aðfarir, en þá hafi drengirnir þrír veist að honum aftur. Sá elsti þeirra hafi fellt hann í jörðina og stungið hann ítrekað með hnífi í búkinn, annar piltanna sparkað ítrekað í búk hans og sá þriðji reynt að sparka í höfuð hans en spark hans geigað.
Bartlomiej lést stuttu síðar af sárum sínum, hlaut hann sex stungusár, áverka í andliti og á höfði, hnjám og höndum. Á úlpu hans voru 10 göt sem báru þess merki að vera eftir stungur með eggvopni.
Drengirnir hafa setið í gæsluvarðhaldi frá 21. apríl. Tveir þeirra á Stuðlum vegna ungs aldurs þeirra og einn í fangelsinu á Hólmsheiði, þar sem heil deild var rýmd til að tryggja að varðhaldið væri með sem minnst íþyngjandi hætti.
Tók árásina upp í stað þess að kalla eftir hjálp
Sautján ára stúlka sem tók manndrápið upp á síma sinn er ákærð fyrir brot á hjálparskyldu, það er að hafa ekki beðið drengina um að hætta og/eða hringja eftir aðstoð lögreglu. Saksóknari segir hana hafa heldur staðið hjá, myndað atlöguna og síðan hlaupið á brott með árásarmönnunum.
Móðir Bartlomiej krefst þess að sakborningarnir verði dæmdir til að greiða henni samtals fimm milljónir í bætur, barnsmóðir Bartlomiej fer fram á sömu upphæð fyrir hönd ólögráða dóttur þeirra.
