Fyrr í dag greindi DV frá því að eigendur Íslensku hamborgarafabrikkunnar hefðu lokað veitingastaðnum í Kringlunni eftir að ábendingar bárust um að fjöldi gesta hefðu orðið veikir eftir að hafa borðað þar nýlega.

Sjá einnig: Loka Fabrikkunni í Kringlunni í dag til að ganga úr skugga um hvort að gestir hafi orðið fyrir matareitrun

„Við tökum frásögnum mjög alvarlega og viljum með þessu tryggja að það sé ekkert upp á okkur að klaga,“ segir María Rún Hafliðadóttir, forstjóri Gleðipinna í samtali við DV, en félagið á og rekur Íslensku Hamborgarafabrikkuna.

Í fréttinni var greint frá að allt að 18 gestir hefðu veikst, þegar hafa um þrett­án til­kynn­ing­ar borist heil­brigðis­eft­ir­liti Reykja­vík­ur vegna mögu­legr­ar matareitr­un­ar á veitingastaðnum. Óskar Ísfeld Sig­urðsson, deild­ar­stjóri mat­væla­eft­ir­lits hjá eft­ir­lit­inu, segir í samtali við Mbl.is að vinnu­til­gáta eft­ir­lits­ins sé sú að ef til vill sé um til­felli nóróveiru að ræða, en eftirlitið hefur þegar farið á staðinn í Kringlunni. 

Í samtali við DV sagði María Rún að útibúinu hefði verið lokað í dag og að verið væri að þrífa staðinn hátt og lágt og sótthreinsa. Unnið hafi verið í nánu samstarfi við Heilbrigðiseftirlitið, vörur hafi verið sendar í greiningu og unnið sé með birgjum í að skoða hvort og þá hvað hafi farið úrskeiðis.

Segir Óskar við Mbl.is að staður­inn muni ekki opna aft­ur án samþykk­is heil­brigðis­eft­ir­lits Reykja­vík­ur og rann­sókn á mál­inu standi yfir.„Okk­ar vinnu­til­gáta er sú, í sam­ráði við þá sem koma að rann­sókn­inni, að þetta gæti verið nóróveira,“ seg­ir Óskar, en hana er ekki hægt að greina í matvælum hérlendis, aðeins í fólki.

„Á meðan erum við bara búin að henda öllu út hér. Svo er nátt­úru­lega rosa erfitt ef þetta er eitt­hvað annað, ef þetta er eitt­hvað sem berst manna á milli, maður veit ekki, það er bara rosa­lega erfitt að segja,“ seg­ir María í samtali við Mbl.is.