Þórarinn Ingi Pétursson þingmaður Framsóknarflokksins segist ætla að beita sér af krafti fyrir því að almenningur fái að sjá öll gögn varðandi sölu á hlut ríkisins í Íslandsbanka, þar á meðal starfslokasamning sem gerður var við Birnu Einarsdóttur fyrrverandi bankastjóra. 

Birna óskaði eftir því að láta af störfum 28. júní síðastliðinn og var Jón Guðni Ómarsson ráðinn í hennar stað.

Þórarinn Ingi, sem situr í fjárlaganefnd Alþingis, sagði í morgun í Vikulokin á Rás 1:

 „Þess vegna mun ég beita mér fyrir því á næstu dögum að ef, til dæmis þessi samningur verður ekki birtur, mun ég beita mér fyrir því innan fjárlaganefndar þingsins að boða til fundar þess efnis og við fáum bara að sjá hvað er verið að gera. Leggjum öll spilin á borðið og byggjum upp traust, því að ef við gerum það ekki þá getum við ekki haldið áfram með þetta mikilvæga ferli að losa um eignarhlut ríkisins í þessum fjármálafyrirtækjum.“ 

Þórarinn Ingi telur ekki ástæðu til að bíða eftir milliuppgjöri Íslandsbanka svo hægt verði að sjá starfslokasamninginn. Þessi upplýsingagjöf sé nauðsynleg svo hægt verði að byggja upp traust að nýju.

Í yfirlýsingu Birnu vegna starfsloka hennar sagðist hún hafa ákveðið að stíga til hliðar „með hagsmuni bankans að leiðarljósi“. Segist hún gera það til að „ró geti myndast vegna sáttar Íslandsbanka við fjármálaeftirlit Seðlabanka Íslands“.