Dómur féll í dag í Landsrétti yfir Herði Sigurjónssyni, öðru nafni Herði snapchatperra, vegna ótal stafrænna kynferðisbrota gegn stúlkubörnum niður í 11 ára aldur.
Segja má að Hörður hafi varið meginhluta ársins 2021 í að áreita stúlkubörn með klámfengnum skilaboðum á Snapchat. Hann bað stúlkurnar um að hitta sig en sem betur fer virðist engin hafa þekkst boðið. Hann ritaði klámfengin skilaboð til stúlknanna og sendi þeim klámmyndir, einni sendi hann meðal annars mynd af getnaðarlim og mynd af endaþarmsmökum.
Á tímabili áreitti Hörður fjölmörg börn í sama skólanum og klæmdist jafnvel við þau eldsnemma á morgnana. Foreldrar barnanna tóku sig saman og kærðu athæfi hans til lögreglu.
Þetta átak varð til þess að Hörður var loksins hnepptur í gæsluvarðhald, átta dögum síðar, en hann hefur setið í fangelsi frá 9. desember árið 2021.
Hörður er á miðjum sjötugsaldri og er fyrrverandi rannsóknarlögreglumaður. Hann hvarf niður í undirheimana einhvern tíma í kringum aldamótin. Árið 2006 var hann einn af þeim sem reyndu að hitta 13 gamla tálbeitu í fréttaskýringaþættinum Kompás, og árið 2009 var hann handtekinn fyrir stórfellt kókaínsmygl í Argentínu.
Landsréttur staðfesti fangelsisdóm héraðsdóms yfir Herði og dæmdi hann í þriggja ára fangelsi. Til frádráttar kemur gæsluvarðhald frá 9. desember 2021, sem þýðir að Hörður losnar úr fangelsi í síðasta lagi í desember árið 2024. Búast á við því að honum verði sleppt fyrr þar sem sjaldgæft er að menn sitji af sér fulla fangelsisdóma, yfirleitt kemur til reynslulausnar eftir að um tveir þriðju af refsingu hafa verið afplánaðir.
Landsréttur dæmir Hörð auk þess til að greiða 13 stúlkubörnum miskabætur. Átta fá 400 þúsund krónur í bætur hver og fimm fá 500 þúsund krónur hver.
Dóma héraðsdóms og Landsréttar má lesa hér.
