Óskar Andri Jónsson, maðurinn sem ákærður hefur verið fyrir tilraun til manndráps með því að sparka manni niður 23 tröppur fyrir utan veitingastaðinn Moe´s Bar Grill við Jafnasel í Breiðholti, neitar sök í málinu. Þetta kemur fram í gæsluvarðhaldsúrskurði sem Landsréttur staðfesti í gær og birtur var á vefsíðu dómstólanna í dag.
Í úrskurðinum kemur einnig fram að ólíkt því sem stefndi í þá hefur ekki verið hægt að yfirheyra brotaþolann um atvikið. Í gæsluvarðhaldsúrskurði héraðsdóms sem Landsréttur staðfestir, segir um ástand hans: „Ekki hefur verið unnt að fá framburð hjá brotaþola. Samkvæmt læknisvottorði hlaut hann alvarlegan heilaáverka, höfuðkúpubrot og dreifðar blæðingar í og við heila beggja vegna. Hann er ófær um að tjá sig og hefur takmarkaðan málskilning. Hann mun að öllum líkindum þurfa að búa við alvarlega máltruflun og hugræna skerðingu. Hann þarf mikið eftirlit í daglegu lífi og hefur ekki innsæi í sína eigin getu. Að mati læknis mun hann til frambúðar þurfa á stuðningi að halda í daglegu lífi vegna hugrænnar skerðingar og máltruflunar.“
Óskar ber við minnisleysi um atvik þetta kvöld og raunar dagana á undan. Segist hann stríða við minnisskerðingu, að virðist af heilsufarsástæðum en upplýsingar um það hafa verið strokaðar út úr úrskurðinum sem er birtur.
Málið var þingfest 6. febrúar og þar neitaði Óskar sök. Aðalmeðferð verður þann 26. apríl við Héraðsdóm Reykjavíkur.
Málið gegn Óskari byggir meðal annars á upptökum úr eftirlitsmyndavélum sem virðast sýna hann ráðast á manninn með fyrrgreindum hætti. Einnig er byggt á framburði vitna.
Gæsluvarðhaldið gildir til 14. apríl en telja verður líklegt að það verði framlengt þar sem aðalmeðferð í málinu er ekki fyrr en 12 dögum síðar.
Sjá úrskurði Landsréttar og héraðsdóms
