Hermann Guðmundsson, forstjóri Kemi, segir stórhættulegt ástand í uppsiglingu vegna fyrirhugaðs verkfalls olíubílstjóra sem eru í Eflingu. Hann hefur í störfum sínum undanfarið orðið var við hömstrun á eldsneyti og segir mikla hættu stafa af því.
Hermann birti stutta færslu á Facebook þar sem hann hvetur Alþingi til að setja lög á fyrirhugað verkfall:
„Nú þegar allt stefnir í víðtækari verkföll og m.a. á að hætta að dreifa eldsneyti á bensínstöðvar eru reipið að herðast um hálsinn á hagkerfinu.
Þar sem eldsneyti er bráðnauðsynlegt öllu hagkerfinu og ekki síst lögreglu, sjúkraliði og öðrum viðbragðsaðilum er afar brýnt að Alþingi undirbúi lagasetningu sem tryggi að eldsneyti verði áfram í dreifingu.
Fyrirtæki og einstaklingar eru að byrja að hamstra eldsneyti og það mun aukast hratt á næstu sólarhringum.“
„Ég held að það sé óumdeilt að það setur allt hagkerfið á hliðina ef eldsneyti hverfur af sölustöðum. Þá hljóta menn að horfa til ábyrgðar sinnar, þeir bílstjórar sem leggja niður störf þurfa þá bara að horfa í spegilinn, séu afleiðingarnar af þeirra kjaradeilu þær að setja 230 þúsund vinnandi hendur í uppnám og valda miklu tjóni,“ segir Hermann í samtali við DV.
Aðspurður hvort krafa um lög á verkfallið sé farin að hljóma hátt meðal atvinnurekenda segir Hermann svo ekki vera en eldsneytishömstrun sé hafin og þar séu hættulegar blikur á lofti: „Nei, efnislega hef ég ekki heyrt það. Ég heyri bara frá mörgum kollegum mínum að menn eru mjög áhyggjufullir. Það eru margir að leita til okkar um að fá stórar umbúðir keyptar, bæði þúsund lítra tanka og 200 lítra tunnur, og ætla að reyna að safna sér eldsneyti til þess að geta þraukað þennan tíma.“
Eldsneytissöfnun sé hættuspil: „Fólk er byrjað að undirbúa það að það verði verkfall sem getur staðið í einhvern tíma. Það er alvarlegt. Það er mikið hættuspil að safna birgðum af eldsneyti á stöðum sem eru ekki fyrir það gerðir. Þetta er mjög eldfimur vökvi, “ segir Hermann og segir ástandið vera grafalvarlegt.
