Héraðsstjórinn í Luhansk sagði í úkraínsku sjónvarpi á mánudaginn að Rússar hafi sent liðsauka til héraðsins og sé það liður í undirbúningi stórsóknar sem hefjist jafnvel í næstu viku. Hann sagði að mikið magn skotfæra hafi verið flutt til svæðisins og nú noti Rússarnir það öðruvísi en áður, nú skjóti þeir ekki lengur allan sólarhringinn, þeir séu að spara skotfæri og undirbúa stórsókn. Reikna megi með að hún hefjist eftir 15. febrúar.
Rússar hafa hert aðgerðir sínar við Bakhmut og Vuhledar í austurhluta Úkraínu eftir áramót en Úkraínumönnum hefur tekist að verjast þeim þar en mannfallið er mikið á báða bóga.
Á mánudaginn sagðist úkraínski herinn hafa fellt rúmlega 1.000 rússneska hermenn á einum sólarhring. Ef rétt er, þá er þetta mesta mannfall Rússa á einum degi frá því að innrásin hófst.
Sérfræðingar telja hugsanlegt að Rússar vilji hefja stórsókn fljótlega til að geta sýnt fram á einhvern árangur þegar eitt ár verður liðið frá upphafi innrásarinnar. Eru rússneskir hershöfðingjar taldir vera undir miklum þrýstingi um að ná árangri á næstunni og þess utan vilja Rússar líklega reyna að sækja fram áður en vestrænir skriðdrekar fara að streyma á vígvöllinn auk langdrægra flugskeytakerfa.
