Tyrknesk yfirvöld hafa þegið boð Íslands um aðstoð vegna jarðskjálftanna sem riðu yfir í gærmorgun.
Slysavarnafélagið Landsbjörg ásamt utanríkisráðuneytnu hófu þegar í gærmorgun undirbúning þess að senda hóp til aðstoðar, og nú liggur fyrir að níu manna hópur mun fljúga til Tyrklands með TF-SIF, flugvél Landhelgisgæslunnar eftir hádegi í dag. Kemur þetta fram í tilkynningu frá Slysavarnafélaginu Landsbjörg.
Hópurinn samanstendur af sérfræðingum í aðgerðastjórnun og samhæfingu aðgerða, sem mikil þörf er á á svæðinu, en þegar þetta er skrifað hafa um 80 alþjóðlegar sveitir boðað komu sína á hamfarasvæðið.
Sólveig Þorvaldsdóttir leiðir íslenska hópinn en hún hefur afar mikla reynslu af stýringu og samhæfingu aðgerða í alþjóðlegum aðgerðum. Sólveig tók þátt í æfingu fyrir hamfarir af svipuðum toga í Tyrkland síðasta haust. Einnig eru í hópnum verkfræðingar, læknir og búðastjóri.
Íslenski hópurinn fer á svæðið undirbúinn fyrir að vera við störf í sjö daga.
Von er á tilkynningu fljótlega frá Landhelgisgæslunni um nánari upplýsingar um brottfarartíma TF-SIF.
