Snorri Másson, ritstjóri samnefnds netmiðils, gerði stólpagrín að Þorsteini V. Einarssyni, kynjafræðingi og umsjónarmanni Karlmennskunnar, í vikulegri yfirferð sinni um það sem bar hæst í fréttum þessa vikuna.
Snorri fjallaði þar um glímu Þorsteins við verslunarrisann Bónus en þar á bæ var tekin sú ákvörðun að selja ekki bók baráttumannsins, Þriðju vaktina, fyrir þessi jól.
Þorsteinn brást við með því að senda út heróp til fjölmargra fylgjenda sinna á samfélagsmiðlinum Instagram. „Bókinni var hafnað að því er virðist af fullkomlega huglægum og tilfinningalegum ástæðum án málefnalegra ástæðna,“ skrifaði Þorsteinn, nafngreindi svo starfsmann fyrirtækisins sem að átti að hafa tekið þessa ákvörðun og hvatti fylgismenn sína til þess að senda viðkomandi tölvupóst og krefjast útskýringa.
Snorri hafði greinilega afar gaman að uppátækinu og sérstaklega þá afhjúpuninni á starfsmanninum.
„Það er auðvitað verðug ábending hjá Þorsteini; að þarna séu huglægar og ómálefnalegar ástæður að baki ákvörðuninni hjá Bónus. Og við verðum alltaf að taka það alvarlega þegar einkafyrirtækið Bónus tekur órökstudda ákvörðun um að svoleiðis traðka á stjórnarskrárvörðum rétti Íslendinga til að selja sjálfsútgefið fræðsluefni sitt í Bónus. Þetta er alvarlegt mál og í svona tilvikum er stundum eina úrræði aktívista að gerast róttækir og svipta hulunni af raunverulega gerandanum í málinu, sem var í þessu tilviki engin önnur en Ester í bókhaldsdeildinni,“ sagði Snorri í þættinum.
Ester í bókhaldsdeildinni í Bónus væri að sögn Þorsteins „gatekeeper allra bóka í Bónus“.
„Hvert er eina úrræði manns gagnvart slíkum gatekeeper, slíkum ómálefnalegum hliðverði? Jú auðvitað bara að afhjúpa hann, afhjúpa Ester og láta hana finna fyrir því. Þorsteinn var neyddur til að grípa til þess ráðs að hvetja alla 22 þúsund fylgjendur Karlmennskunnar á Instagram til þess að „senda endilega fyrirspurn“ á þennan skrifstofustarfsmann Bónus í tölvupósti, á netfang Esterar sem er birt í færslunni, til að “spyrjast fyrir” um ástæður þess að Bónus sé ekki að selja þessa bók um þriðju vaktina,“ sagði Snorri og gaf í skyn að Þorsteinn hefði prjónað aðeins yfir sig.
„Enginn óeðlilegur þrýstingur að siga 22 þúsund fylgjendum sínum beint á netfangið hjá Ester, engin áreitni í því, nei bara forvitni, bara einföld spurning: Af hverju, Ester, af hverju verður „Þriðja vaktin“ ekki seld í Bónus? Ertu með einhvern málefnalegan rökstuðning?,“ sagði Snorri og sagðist hafa áhuga á að vita hvernig tölvupóstur Esterar hafi litið út eftir hvatningu baráttumannsins.
Þrátt fyrir að Bónus hafi neitað að selja Þriðju Vaktina og Nettó hafi ekki einu sinni svarað Þorsteini varðandi sölu á bókinni þá hafa þegar selst um 1100 bækur, samkvæmt Instagram-síðu Þorsteins, sem verður að teljast fínn árangur.
