Stórhætta hefur skapast dag eftir dag þegar börn hafa gengið út á ótraustan ís á Sandvík, austan við Borgarnes. Á sunnudag voru viðbragðsaðilar kallaðir til þegar óttast var um að einhver hefði fallið ofan í sjóinn.
„Það hafa verið krakkar að labba þarna úti á ísnum dag eftir dag. Það er svo mikil flóð og fjara, þetta er rosalega hættulegt,“ segir listakonan Josefina Morell, sem býr innarlega í Borgarfirðinum. Hún náði að taka ljósmynd af tveimur krökkum á gangi á ísnum.
Skessuhorn greindi frá því að viðbragðsaðilar hefðu verið kallaðir út um klukkan 14:30 á sunnudag vegna hugsanlegs slyss á ísnum, nálægt ferðaþjónustubænum Bjargi. Sem betur fer reyndist svo ekki vera og var útkallið afturkallað eftir nokkrar mínútur.
„Í fyrradag var björgunarsveitarmaður á göngu með hundinn sinn og rak augu í krakka sem voru komnir langleiðina út að álnum. Það fór betur en á horfðist. Það þarf ekki að spyrja að leikslokum ef einhver dettur ofan í,“ segir Heiður Hörn Hjartardóttir, íbúi á Bjargi.
Heiður segir ísinn mjög ótraustan. Ísinn er sérstaklega hættulegur þegar flæðir að en straumurinn er líka oft mjög mikill á þessum stað. Vakir myndast í ísinn sem auðveldlega er hægt er að falla niður um.
„Það er orðinn vani hjá okkur að fylgjast með firðinum. Það er voða algengt að fólk sé að fara út á,“ segir Heiður. Engin skilti eru til að vara fólk við að fara út á ísinn eða annars konar varúðarmerkingar.
Oftast eru það börn sem sjást ana út á ísinn en það kemur einnig fyrir að fullorðnir geri það. Heiður telur að oftast nær séu það erlendir ferðamenn sem þekki ekki aðstæðurnar.
„Þeir sjá aðeins fallegt svæði til að labba á en átta sig ekki á hvað er undir,“ segir Heiður. „Við erum kannski búin að missa svolítið tengslin við náttúruna. Við áttum okkur ekki lengur á hættunum.“
