Búast má við því að öryggisgæsla á samkomum líkt og fram fór á föstudag í Veröld, húsi Vigdísar, verði hert eftir að mótmælendur köstuðu glimmeri yfir Bjarna Benediktsson utanríkisráðherra.

Morgunblaðið greinir frá því í dag að meiri öryggisgæsla verði þannig viðhöfð á samkomu til minningar um helförina en til stóð. Morgunblaðið ræddi við fulltrúa erlends ríkis sem sagði að hætt hefði verið við að hafa opið á minningarstund um helförina því ekki væri lengur á það hættandi.

Þá ræddi Morgunblaðið við fulltrúa annars erlends ríkis sem sagði það koma mjög á óvart að mótmælendur gætu tekið yfir fundi í Háskóla Íslands líkt og þeir gerðu á föstudag.

Karl Steinar Valsson, yfirlögregluþjónn alþjóðasviðs ríkislögreglustjóra, sagði við mbl.is á föstudag að mótmælendur í Veröld hefðu gengið of langt. Benti hann á að hingað til hefði ekki verið talin þörf á mikilli gæslu í kringum ráðamenn.

„Þetta er bara í skoðun eft­ir þá at­b­urðarás sem við sáum þarna. Þetta er nátt­úru­lega eng­an veg­inn viðeig­andi,“ sagði Karl Steinar.