Óhætt er að segja að niðurstöðurnar séu ekki góðar fyrir Ísland á ýmsum sviðum en þær sýna til dæmis verri árangur nemenda í þátttökulöndum miðað við fyrri kannanir, meðal annars á öllum Norðurlöndum og er lækkunin meiri á Íslandi. Góðu fréttirnar eru samt þær að íslenskum nemendum líður almennt vel í skólanum og standa þeir betur en jafnaldrar sínir annars staðar á því sviði.
Á vef Stjórnarráðsins eru niðurstöðurnar tíundaðar frekar og birt gröf sem sýna að Ísland mælist undir meðaltali OECD í öllum flokkum, það er stærðfræðilæsi, lesskilningi og læsi á náttúruvísindi. Lægra hlutfall býr yfir grunnhæfni og afburðahæfni borið saman við meðaltal Norðurlandanna og OECD.
Á vef Stjórnarráðsins er farið frekar í niðurstöður könnunarinnar en þar kemur fram að nemendum á Íslandi líði almennt vel í skólanum og upplifi að þeir tilheyri þar.
„Ólíkt nemendum flestra landa koma þeir betur út úr þessari mælingu 2022 en 2018. Þeir hafa jákvæða upplifun af kennurum sínum og upplifa sjaldan einelti. Í þessum atriðum standa þeir betur en jafnaldrar sínir í OECD-ríkjum og á Norðurlöndunum. Nemendur af 1. kynslóð innflytjenda á Íslandi standa hins vegar verr en aðrir nemendur á Íslandi í öllum mælingum á líðan.“
Bent er á það að heimsfaraldur hafi haft margvísleg áhrif á skólastarf, kennara og nemendur. Þannig hafi tvö af hverjum þremur þátttökulöndum í PISA 2022 lokað skólum í þrjá mánuði eða lengur. Þróun frammistöðu landa í heild frá 2018 til 2022 bendi til áhrifa faraldursins, einkum í stærðfræðilæsi og lesskilningi.
„Nemendur sem eiga foreldra í lakari félags- og efnahagslegri stöðu koma verr út í könnuninni þvert á þátttökulönd. Merki eru um aukningu í ójöfnuði í námsárangri í PISA á Íslandi yfir tíma, einkum í lesskilningi, og er svipaður hér og á hinum Norðurlöndunum. Lægra hlutfall drengja nær grunnhæfni í læsi á náttúruvísindi (61%) en stúlkna (68%) en kynjamunur er mestur í grunnhæfni í lesskilningi (53% hjá drengjum á móti 68% hjá stúlkum),“ segir enn fremur.
Þá segir að ljóst sé af niðurstöðum PISA 2022 að stjórnvöld, sveitarfélög, stofnanir og samtök þurfi að leggjast á eitt við að skilja ástæður þeirrar neikvæðu þróunar í lesskilningi og læsi sem kemur fram í könnuninni og bregðast við.
