Eins og greint var frá fyrr í morgun hefur Ríkislögreglustjóri lýst yfir hættustigi Almannavarna vegna mikilla skemmda á neysluvatnslögninni sem liggur til Vestmannaeyja.
Í tilkynningu frá bæjaryfirvöldum í Vestmannaeyjum segir að það komi auðvitað óþægilega við alla íbúa þegar þær aðstæður skapist að flytja þurfi bæinn á hættustig, en því fylgi reyndar líka ákveðið öryggi. Það þýði að almannavarnayfirvöld fylgist mjög náið með stöðu mála og viðbragðsáætlanir verði til samræmis við þær aðstæður sem upp kunni að koma. Bestu sérfræðingar hérlendis og erlendis séu komnir að málinu til að tryggja að vatnið haldi áfram að streyma til Eyja.
Leiðslan sé að skila fullu vatnsmagni en sé hins vegar mikið skemmd og því verði Vestmannaeyingar að vera búnir undir allar sviðsmyndir sem upp geti komið. Bæjarbúar verði að sjálfsögðu upplýstir samstundis ef breyting verði á þessari stöðu og ef þeir þurfi að grípa til einhverra ráðstafana, en svo sé ekki á þessu stigi.
Unir tilkynninguna rita Íris Róbertsdóttir, bæjarstjóri, Páll Magnússon, forseti bæjarstjórnar ogEyþór Harðarson, bæjarfulltrúi.
Þau eru í vinnuhópi fyrir hönd bæjarstjórnar í þessu máli og munu starfa með almannavarnayfirvöldum, stjórnvöldum, HS veitum og öðrum sérfræðingum sem að málinu koma til að þessu ástandi megi linna sem allra fyrst.
