Í frétt Vísis í morgun kemur fram að Okeke hafi farið í hjartastopp í öðrum leikhluta leiksins. Okeke er með gangráð eftir aðgerð sem hann gekkst undir árið 2018 og segir í frétt Vísis að gangráðurinn hafi gefið honum stuð sem varð til þess að hann komst til meðvitundar og náði að reisa sig við. Hann virtist aftur fá stuð frá gangráðnum skömmu síðar.
Eftir að hafa fengið sér sæti á varamannabekknum í stutta stund var hann fluttur á sjúkrahús.
Vísir hefur eftir Maté Dalmay, þjálfara Hauka, að læknir hefði tjáð honum að Okeke hefði fengið tvö væg hjartastopp. „Það var farið með hann beint upp á spítala og það hljómar alls ekki vel, þannig ég bara hef ekki hugmynd,“ sagði þjálfarinn eftir leikinn í gærkvöldi.
Okeke er 25 ára gamall og af nígerískum uppruna. Hann þótti mjög efnilegur á sínum yngri árum og var í silfurliði Ítala á HM U-19 í Egyptalandi árið 2017. Hann gekkst undir aðgerð í febrúar 2018 vegna takttruflana í hjartanu og var hann frá keppni í um tvö ár vegna þess.
Tindastóll vann leikinn í gærkvöldi, 78-68, en Okeke var búinn að skora 14 stig þegar atvikið varð í öðrum leikhluta leiksins.
