Árum saman hafa Pakkajól verið hluti af jólagleðinni í Smáralind. Um helgina hefst söfnun jólagjafa fyrir börn sem búa við bág lífskjör á Íslandi. Mörgum er það bæði ljúft og skylt að stinga einum pakka eða fleirum undir tréð og líta jafnvel á það sem eina af jólahefðunum. Það er fátt eins nærandi og að láta gott af sér leiða, til dæmis með því að gefa eina jólagjöf í viðbót sem gleður jafnvel meira en allar aðrar. Pósturinn tekur þátt í að dreifa jólagleðinni eins og ævinlega, eins og segir í fréttatilkynningu.

Hlutverk Póstsins er að gera öllum landsmönnum kleift að leggja söfnuninni lið. Þau sem búa á landsbyggðinni en vilja setja pakka undir jólatréð í Smáralind geta póstlagt pakkann á hvaða pósthúsi sem er, sér að kostnaðarlausu. Það er nóg að nefna að pakkinn sé fyrir Pakkajólin. Við hvetjum alla til að koma með pakkann sem fyrst því úthlutun góðgerðarfélaganna hefst um miðjan desember.

Á vef Smáralindar kemur fram að gjafirnar sem safnast undir jólatréð í Smáralind fari til barna og unglinga á Íslandi sem búa við bág kjör. Þar segir enn fremur að þörf sé á gjöfum fyrir aldurinn 0-18 ára og að Hjálparstarf kirkjunnar, Fjölskylduhjálp Íslands og Mæðrastyrksnefnd sjái um að koma gjöfunum í réttar hendur. Gjöfin þarf að vera innpökkuð og merkt með upplýsingum um hvaða kyni og aldri hún er ætluð.