Ozempic var þróað sem lyf í baráttu gegn sykursýki og hefur reynst byltingarkennt í baráttu við offitu. Eiginmaður Trish telur að lyfið hafi átt sinn þátt í dauða hennar.
Í umfjöllun New York Post kemur fram að Trish hafi fengið Ozempic ávísað frá lækni þar sem hún vildi komast í ákveðinn kjól fyrir brúðkaup dóttur sinnar. Samhliða því fékk hún lyfið Saxenda og virtust lyfin hafa góða virkni þar sem Trish hafði lést um 16 kíló á fimm mánuðum.
Ozempic líkir eftir náttúrulegu hormóni, GLP-1, sem er losað úr þörmum eftir máltíðir og hægir þannig á meltingunni. Vandamál geta komið upp ef lyfið hægir of mikið á starfsemi meltingarfæranna og stíflur myndast í meltingarveginum.
Þann 16. janúar síðastliðinn, nokkrum mánuðum fyrir brúðkaupið, kom eiginmaður Trish, Roy Webster, að eiginkonu sinni meðvitundarlausri á heimili þeirra.
„Það lak brúnn vökvi út úr munninum á henni. Ég áttaði mig á því að hún andaði ekki og ég hóf endurlífgun,“ sagði Roy í samtali við 60 Minutes Australia í síðustu viku.
Trish var flutt á sjúkrahús í kjölfarið þar sem hún var úrskurðuð látinn stuttu síðar. Í ljós kom að hún þjáðist af iðrabólgu og leikur grunur á að Ozempic hafi átt þátt í dauða hennar.
„Ef ég hefði vitað að þetta gæti gerst þá hefði hún ekki tekið þessi lyf. Ég hélt að maður gæti ekki dáið af þessu,“ segir Roy.
Tekið er fram í umfjöllun New York Post að ekki sé búið að kveða upp þann dóm að Ozempic hafi átt beinan þátt í dauða Trish en Roy segist þess fullviss að lyfið hafi átt sinn þátt.
