Út er komin bók eftir heimspekinginn Þorvald Logason þar sem rakin er saga Eimreiðarhópsins svokallaða og mönnum tengdum honum, Eimreiðarelítan: Spillingarsaga. Bókin byggir að hluta á óbirtum trúnaðargögnum Landsbankans en í henni er lýst hvernig rótgróin spilling olli bankahruninu og almennum kerfisvanda í íslensku samfélagi.

„Ég er að rannsaka lítinn hóp sem hafði lygileg völd í ótrúlega langan tíma,“ segir Þorvaldur sem er heimspekingur að mennt en þessi bók byggir að hluta á meistararitgerð hans í félagsfræði frá árinu 2011.

Þorvaldur, sem er búinn að starfa í auglýsingabransanum í áratug, segist hafa verið lengi með þessa bók í maganum sem er sú fyrsta sem hann skrifar. En hún byggir einnig á óbirtum trúnaðargögnum úr Landsbankanum sem Þorvaldur komst yfir.

„Í bókinni reyni ég að fanga helsta spillingarvanda samfélagsins, að hluta til sem olli hruninu og að hluta til almennan vanda. Einnig skilgreini ég þá sem voru líklegastir til að bera ábyrgð á hruninu. Hverjir réðu í raun og hverjir högnuðust,“ segir Þorvaldur.

Völdin náð hámarki árið 2008

Eimreiðarhópurinn er kenndur við útgáfu tímaritsins Eimreiðin árið 1972 og boðuðu frjálshyggju. Þetta voru meðal annara Davíð Oddsson, Geir H. Haarde, Þorsteinn Pálsson, Kjartan Gunnarsson, Jón Steinar Gunnlaugsson, Þór Whitehead, Vilhjálmur Þ. Vilhjálmsson, Hrafn Gunnlaugsson og Brynjólfur Bjarnason.

Þorvaldur segist bæta við þennan hóp tengda menn eins og Friðrik Sófusson og þess vegna notar hann heitið eimreiðarelítan í stað eimreiðarhópsins.

Bókin spannar langt tímabil, frá árinu 1982 og vel fram yfir bankahrunið árið 2008. En það er sá tími þegar þessi hópur var valdamestur.

„Margir myndu halda að þeir hefðu að mestu misst völdin árið 2003 og útrásarvíkingarnir tekið yfir þá hef ég þá kenningu að valdatímabil þeirra hafi náð hámarki árið 2008,“ segir Þorvaldur.

Fræðibók fyrir almenning

Bókin er fræðibók, byggð á valdaelítukenningum úr félagsfræði, en einfölduð og skrifuð fyrir almenning.

„Þetta eru kenningar um að ákveðinn hópur ráðandi aðila í samfélaginu á hverju valdsviði fyrir sig, þekkingarvaldi, framkvæmdavaldi, þingvaldi og viðskiptavaldi eða auðvaldi, myndi ákveðið bandalag og ráði því sem vert er að ráða í samfélaginu,“ segir Þorvaldur.

Þetta skapi spillingu sem sé bæði kjarnavandamál í samfélaginu og vandamál sem getur valdið allsherjar hruni.

Bókin kom úr prentun fyrir rúmri viku síðan og er komin í verslanir Pennans. Einnig er hægt að panta bókina á heimasíðunni steinason.is.