Þetta segir Tómas í samtali við Morgunblaðið í dag.
Talsverð skjálftavirkni hefur verið á Reykjanesi að undanförnu og mælist miðja landriss á svæðinu nú nærri fjallinu Þorbirni. Benda mælingar til þess að kvika sé að safnast fyrir á um fjögurra kílómetra dýpi. Í nágrenninu eru mikilvægir innviðir eins og virkjunin í Svartsengi og Bláa lónið.
Tómas segir að ef rafmagn færi yrði það ekki stór skaði því Reykjanesvirkjun og Suðurnesjalína 1 myndu sjá svæðinu fyrir rafmagni. „En ef hitaveitan fer þá er náttúrlega dálítið mikið mál að koma upp annarri hitaveitu og það er ekkert sveitarfélag með varahitaveitu. Þá þyrftum við að bregðast við eftir því hversu alvarlegt það er og það gæti tekið tíma,“ segir Tómas við Morgunblaðið í dag.
Þá er haft eftir Helgu Árnadóttur, framkvæmdastjóra sölu, rekstrar og þjónustu í Bláa lóninu, að fyrirtækið sé í nánu samráði við Almannavarnir og sérfræðinga Veðurstofunnar. Rýmingaráætlun vegna eldgoss sé til staðar og fyrirtækið telji sig vel í stakk búið til að takast á við slíkar aðstæður.
Segir hún að gert sé ráð fyrir að tvær klukkustundir séu nægilega langur tími til að framkvæma rýmingu á öllum svæðum. Fyrirmælum sérfræðinga og Almannavarna verði fylgt í hvívetna.
„Þeir eru sér fræðingarnir og við fylgjum þeim í einu og öllu,“ segir hún við Morgunblaðið í dag.
