„Við erum bara þokkaleg miðað við aðstæður, en við erum bara svona rétt að lenda eftir þetta,“ sagði Edda Björk Arnardóttir í stuttu viðtali við DV í morgun. Hún var handtekin ásamt eiginmanni sínum í gærkvöld er sýslumaður hugðist láta fullnusta aðgerð gegn henni er varðar fyrirhugaðan brottflutning þriggja sona hennar til Noregs, í hendur föður þeirra sem hefur forræði yfir þeim. Bæði héraðsdómur og Landsréttur hafa úrskurðað að drengirnir skulu teknir úr umsjá Eddu Bjarkar og Hæstiréttur hefur synjað henni um áfrýjunarleyfi í málinu.
Töluverður mannfjöldi safnaðist saman fyrir utan heimili Eddu Bjarkar í Fannafold í gærkvöld eftir að spurðist út að hún hefði verið handtekin. Meðal annars var þar að finna bekkjarfélaga sona hennar. Edda Björk varð ekki vör við þetta fyrr en hún kom til baka eftir að henni var sleppt lausri úr haldi lögreglu. Hún tekur fram við DV að hún hafi ekkert gert sjálf til að safna fólki saman við hús hennar og ekki kallað eftir stuðningi. „Ég var ekki í aðstöðu til að hringja í neinn,“ segir hún.
Hún segir að það hafi engu að síður verið einstakt að upplifa stuðning fólks. „Það var bara frábært og ótrúlegt. Næstum allir drengirnir í bekkjum strákanna minna voru hérna fyrir utan og klöppuðu fyrir þeim. Þetta var ótrúlegur stuðningur fyrir strákana.“
Aðspurð segir hún að eiginmaður hennar hafi verið settur í járn við handtökuna en hún ekki. Hún sér ekki ástæðu til að gagnrýna lögreglumenn fyrir þeirra framgöngu. „Þau voru bara að vinna vinnuna sína, þannig lagað, þó að það hafi verið dólgur í einhverjum þeirra þá er það bara eins og gengur. En ég hrósa ekki sýslumanni og barnavernd fyrir aðkomu þeirra að málinu, þau stjórnuðu aðgerðum hérna.“
Sem fyrr segir vissi Edda Björk ekki um mannsöfnuðinn fyrir utan heimili hennar fyrr en hún kom heim af lögreglustöðunni. Hún segir upplifunina hafa verið ótrúlega. Hún veit hins vegar ekki hvað tekur við núna. Hún segist ekki vita hver tók ákvörðun um að fresta aðgerðinni í gærkvöld.
„Við vitum akkúrat ekki neitt núna. Það er bara verið að fara yfir lagalegu hliðina á þessu máli,“ segir Edda Björk en hún og lögmaður hennar bíða eftir að fá frekari upplýsingar um gang málsins.
