Í viðtali við CNN sakar Rania drottning Jórdaníu vestræna leiðtoga um að sýna af sér augljósan tvískinnung þar sem þeir fordæmi ekki dauða almennra borgara sem orðið hafi fyrir sprengjuárásum Ísrael á Gaza-svæðinu.

Drottningin segir að fólk í mið-austurlöndum þar á meðal Jórdaníu sé furðu lostið og vonsvikið yfir viðbrögðum heimsbyggðarinnar við árásunum og gríðarlegum afleiðingum þeirra. Á síðustu vikum hafi tvískinnungur heimsins blasað við.

Heimurinn hafi staðið með Ísrael eftir árás Hamas-samtakanna 7. október síðastliðinn en þögnin ríki eftir árásir Ísraels á Gaza.

Hún segir að í fyrsta sinn í sögu síðari tíma sé ekki verið að kalla eftir vopnahléi eftir svo miklar mannlegar þjáningar. Þögnin sé ærandi og fyrir mörgu fólki á svæðinu séu Vesturlönd samsek vegna þagnarinnar.

Drottningin segir því haldið fram að það sé rangt að myrða heila fjölskyldu með hríðskotabyssum en spyr hvort það sé í lagi að gera það með stórskotaliðsárás. Arabaheimurinn sé einfaldlega furðu lostinn.

Rania drottning vísar til frétta af því að palestínskar mæður séu farnar að skrifa nöfn barna sinna á hendur þeirra svo hægt verði að bera kennsl á börnin ef þau láta lífið af völdum sprengjuárása Ísraels:

„Ég vil bara minna heimsbyggðina á að palestínskum mæðrum þykir jafn vænt um börnin sín og öllum öðrum mæðrum í heiminum.“

Drottningin lagði einnig mikla áherslu á að átökin hafi ekki byrjað með árás Hamas þann 7. október síðastliðinn. Þetta sé 75 ára löng saga dauða og nauðungarflutninga fyrir Palestínumenn. Saga hernáms ísraelskra stjórnvalda sem standi fyrir aðskilnaðarstefnu, rífi hús, geri land upptækt og geri hernaðarlegar árásir.

Hún segir einu lausnina á þessum 75 ára löngu átökum vera stofnun frjáls og fullvalda ríkis Palestínumanna sem lifi í friði og öryggi með Ísraelsríki.