Tveir menn, John Waldrop og Toney Jones, hafa verið ákærðir í borginni New York í Bandaríkjunum fyrir ólöglegan flutning á uppstoppuðum fuglum og eggjum. Um er að ræða hundruð friðaðra fugla, meðal annars frá Íslandi.

Waldrop og Jones, sem eru 74 og 53 ára gamlir, notuðu ýmsar vefsíður til að kaupa fuglana. Til dæmis Ebay og Etsy. Í að minnsta kosti eitt skipti, árið 2020, fluttu þeir fugla sjálfir inn með flugvél.

Auk hundruð fugla keyptu þeir þúsundir eggja friðaðra fugla. Saksóknari krefst upptöku á samtals 779 fuglshræjum og 2594 eggjum.

„Út frá hagsmunum Bandaríkjanna og heimsins er mikilvægt að framfylgja alríkislögum og alþjóðlegum sáttmálum sem vernda fugla í útrýmingarhættu fyrir þeim sem vilja hagnast á þeim eins og sakborninganna í þessu máli,“ sagði Breon Peace, saksóknari í málinu.

Vonast er til þess að málið sendi skýr skilaboð til þeirra sem vilja hagnast á smygli og sölu með ólöglegar dýraafurðir.

Hörð viðurlög

Auk Íslands komu fuglarnir til dæmis frá Þýskalandi, Ítalíu, Rússlandi, Suður Afríku, Möltu og Úrúgvæ.

Mennirnir fluttu meðal annars inn ránfugla á borð við fálka, erni og uglur. Líklegast verður að teljast að eitthvað af þeim fuglum hafi komið frá Íslandi.

Einnig fluttu mennirnir inn ýmsar tegundir kanarífugla, páfagauka, hrægamma, anda, gæsa, máva og spörfugla.

Að sögn talsmanna bandaríska dómsmálaráðuneytisins er þessi innflutningur brot á dýra og tollalögum. Auk þess eru Waldrop og Jones ákærðir fyrir peningaþvætti fyrir að senda peninga til annarra landa til að geta fjármagnað smygl á fuglshræjum.

Verði Waldrop og Jones sakfelldir gætu þeir átt allt að 20 ára fangelsisdóm yfir höfði sér. Einnig sekt upp á 250 þúsund dollara, eða 35 milljónir króna.