Öfgahægriflokkurinn Sambandið fékk rúmlega tvöfalt meira fylgi á meðal Pólverja á Íslandi en í Póllandi í þingkosningunum sem fram fóru á sunnudag. Stjórnarflokkurinn Lög og réttlæti beið afhroð.
Tæplega 6 þúsund Pólverjar á Íslandi kusu í þingkosningunum, í fimm kjördeildum. Reykjavík, Hafnarfirði, Reykjanesbæ, Akureyri og Vík í Mýrdal. Niðurstöðurnar hér voru nokkuð á skjön við heildarúrslit kosninganna.
Eins og fram hefur komið missti stjórnarflokkurinn, hægri pópúlistaflokkurinn, Lög og réttlæti hreinan meirihluta sinn sem hann hefur haft undanfarin tvö kjörtímabil. Flokkurinn fékk aðeins 35,4 prósenta fylgi og útlit er fyrir að hann verði í stjórnarandstöðu.
Á Íslandi fékk Lög og réttlæti hins vegar aðeins 10,1 prósenta fylgi. Mest fylgi fékk flokkurinn í Hafnarfirði, 12 prósent, en innan við 6 prósent í Vík. Í síðustu þingkosningum, árið 2019, studdu 17 prósent Pólverja á Íslandi flokkinn.
Pólverjar á Íslandi eru hins vegar mun hrifnari af Sambandinu, sambandi flokka hægri öfgamanna. Flokkurinn fékk aðeins rúmlega 7 prósenta fylgi í heildarkosningunni en á Íslandi fékk hann 15,4 prósent.
Flokkurinn tekur til dæmis mjög harða afstöðu gegn innflytjendum, hinsegin fólki og Evrópusambandinu og vill algjört bann við þungunarrofi. Þá hafa flokksmenn orðið uppvísir að gyðingahatri.
Sambandið fékk mest fylgi hjá Pólverjum í Reykjanesbæ, 18,1 prósent, og er næst stærsti flokkurinn þar. Í Hafnarfirði fékk Sambandið 16 prósenta fylgi, rúmlega 14 prósenta í Reykjavík en tæplega 14 prósent á Akureyri og Vík.
Helstu sigurvegarar kosninganna á Íslandi eru Borgaravettvangurinn, sem Donald Tusk leiðir, og bandalag vinstri manna, eða Nýja vinstrið.
Hinn frjálslyndi Borgaravettvangur fékk rúmlega 35 prósent atkvæða á Íslandi, en tæplega 31 prósent ytra. Flokkurinn var langstærstur í öllum kjördæmum og fékk mest fylgi á Akureyri, 36,5 prósent.
Vinstrimenn töpuðu fylgi í heildarkosningunni og fengu aðeins 8,6 prósent. Pólverjar á Íslandi eru hins vegar mun vinstrisinnaðri því að Nýja vinstrið fékk 20,7 prósent hér. Mest á Akureyri, 25,2 prósent, en minnst í Reykjanesbæ, 16,4 prósent.
Þriðja leiðin, evrópusinnað bandalag miðjumanna, fékk 14 prósent hér á landi sem er mjög svipað hlutfall og í heildarkosningunni. Mest fylgi fékk flokkurinn á Vík, 16,2 prósent.
