Matvælastofnun (MAST) hefur gefið út yfirlýsingu í kjölfar frétta af ekkjunni og bóndanum Helgu Björgu Helgadóttur, sem var gerð úttekt hjá eftir andlát mannsins hennar. Helga sagði hræðilegt að hafa þurft að ganga í gegnum þessa úttekt á þessum tíma og hún hafi hugsað um að hætta búskap.
„Vegna umfjöllunar um erfiðleika ekkju við að fá mjólkursöluleyfi er rétt að taka fram að í þeim tilfellum þar sem annað hjóna/sambúðafólks er skráð fyrir leyfi til mjólkursölu og sá aðili fellur frá þarf að gefa út nýtt leyfi,“ segir í yfirlýsingunni sem birt var á vef MAST í dag.
Í þeim tilfellum þar sem almenn fjósaskoðun hafi ekki farið fram nýlega sé hún gerð samhliða þessum breytingum. Reglubundnar eftirlitsheimsóknir séu hluti af reglubundnu eftirliti MAST með kúabúum.
„Nánast undantekningarlaust er mjólkursöluleyfi gefið út á þann aðila sem tekur við búskapnum en fram að þeim tíma er mjólk lögð inn á dánarbú viðkomandi aðila. Í þessu tilviki var eftirlit framkvæmt daginn eftir að umsókn barst og mjólkursöluleyfi veitt,“ segir MAST.
Þetta mál sýni þó að hugsanlega sé rétt að breyta fyrirkomulaginu á skráningunni. „Í kjölfar umfjöllunar sem þessarar er rétt að taka til skoðunar hvort réttara væri að þeir aðilar sem standa að leyfisskyldri framleiðslu skulu allir vera skráðir sem leyfishafar til að auðvelda umskipti sem þessi.“
Bent er á að eftirlitsfólk MAST sé þjálfað fagfólk á sínu sviði og það reyni að taka tillit til þeirra aðstæðna sem eftirlitsþegar eru í. Meginmarkmiðið sé þó ávalt að sinna skyldum sínum gagn vart hlutverkum stofnunarinnar.
