Ásdís Kristjánsdóttir, bæjarstjóri Kópavogs, segir það rangt að bæjarstjórn hafi áform um að bjóða úr rekstur Salarins. Sú leið hafi komið til tals en sé nánast útilokuð.

Eins og DV greindi frá fyrr í dag hafa Klassís, félag klassískra söngvara, og klassísk tónlistardeild Félags íslenskra hljómlistarmanna lýsti yfir þungum áhyggjum af því að starfsemin verði boðin út. Fjórir flokkar í minnihluta bæjarstjórnar tóku undir þessar áhyggjur.

Ásdís segir um misskilning að ræða. „Engin ákvörðun hefur verið tekin um að úthýsa rekstri Salarins en stjórn Klassís virðist hins vegar draga þá ályktun, án þess að kynna sér málið,“ segir hún.

Segir hún að bæjarstjórn hafi vissulega áform um að efla enn frekar menningarstarfið í bænum. Einn liður í því sé að kortleggja með hvaða hætti unnt sé að styrkja enn frekar starfsemi Salarins.

Sjá einnig:

Ólga vegna væntanlegs útboðs Salarins í Kópavogi – „Þetta mun enda sem skemmtistaður“

„Áform eru um að skipa starfshóp til að skoða möguleika á að efla starfsemina þótt útvistun hafi vissulega verið nefnd í því samhengi, að skoða kosti þess og galla, hefur hins vegar ekkert komið fram sem bendir til þess að sú leið verði farin og nánast útilokað,“ segir Ásdís.

Nú sé verið að auglýsa eftir nýjum forstöðumanni og með honum verður stefna Salarins mótuð áfram.