Rússneska þingið hefur samþykkt frumvarp utanríkisráðuneytisins um að hækka verð á vegabréfsáritunum frá borgurum ESB og EFTA. Þetta er svar við ákvörðun Evrópuríkja um að rifta öllum samningum við Rússa um einfaldar áritanir.
Samkvæmt frumvarpinu munu áritanir nú kosta á bilinu 7 til 43 þúsund krónur. Fer það eftir því hversu mikið liggur á að fá áritunina. Í dag kosta áritanir fyrir Evrópubúa á bilinu 5 til 10 þúsund.
Gilda þessar reglur fyrir borgara allra 27 ríkja Evrópusambandsins, Íslands, Noregs, Liktenstein og Sviss.
Rússneski ferðamannaiðnaðurinn hefur mótmælt ákvörðuninni. Alexander Kurnosov, varaforseti félags rússneskra ferðaskrifstofa, sagði að reglurnar væru glórulausar. Það væri hvort eð er nánast enginn að koma frá Evrópu til Rússlands.
Mörg Evrópulönd hafa hamlað mjög ferðum til og frá Rússlandi eftir að Rússar réðust inn í Úkraínu í febrúar í fyrra.
Íslendingar og fleiri lönd hafa meðal annars bannað rússneskar flugvélar í sinni lofthelgi og sett á hafnbann á rússnesk skip. Finnar, Norðmenn, Pólverjar og Eystrasaltslöndin hafa bannað rússneskum bifreiðum að keyra yfir landamærin.
