Samfylkingin hefur rofið 30 prósenta múrinn hjá þjóðarpúlsi Gallup. Mælist nú flokkurinn með 30,1 prósenta fylgi.

Ef þetta yrðu niðurstöður kosninga myndi þetta þýða að flokkurinn fengi 21 þingsæti. Á stórveldistíma Samfylkingarinnar, á fyrsta áratug aldarinnar, fékk flokkurinn í tvígang 20 þingsæti en aldrei fleiri. Mest fékk flokkurinn 31 prósent fylgi í alþingiskosningunum árið 2003.

Þetta er bæting um 1,6 prósent milli kannana, en sú síðasta var birt 4. september. Þá mældist Samfylkingin með 28,5 prósent sem myndi duga fyrir 19 þingsætum.

Sjálfstæðisflokkur og Píratar dala

Sjálfstæðisflokkurinn fer niður um 0,7 prósent á milli mánaða og mælist nú með 20,4 prósent. Það myndi duga fyrir 14 þingsætum en flokkurinn fékk 16 í síðustu alþingiskosningum, árið 2021. Skömmu eftir þær gekk hins vegar Birgir Þórarinsson, þingmaður Miðflokksins, í raðir Sjálfstæðismanna og eru þeir því 17 í dag.

Fylgi Pírata dalar einnig um 0,7 prósent á milli mánaða og mælist nú 9,6 prósent. Þetta þýðir 6 þingmenn, sem er sama tala og flokkurinn hefur í dag.

Miðflokkur enn stærri en Framsókn

Miðflokkurinn heldur áfram að mælast stærri en Framsóknarflokkurinn, þó að fylgið dragist örlítið saman. Mælist Miðflokkurinn nú með 8,6 prósent sem dugar fyrir 6 þingsætum. Framsókn mælist með 8,1, sem er bæting um rúmt hálft prósent á milli mánaða en myndi engu að síður aðeins duga fyrir 5 þingsætum. Það yrði afhroð fyrir flokkinn sem fékk 17,3 prósent í síðustu kosningum og 13 menn kjörna.

Viðreisn bætir við sig 0,7 prósentustigum á milli mánaða og mælist nú með 7,9 prósent. Rétt eins og hjá Framsókn myndi það duga fyrir 5 þingsætum.

Fylgi Vinstri grænna, flokki Katrínar Jakobsdóttur forsætisráðherra, er áfram mjög lágt og lækkar um 0,2 prósent milli mánaða. Rétt eins og Flokkur fólksins mælast Vinstri græn með 5,7 prósent sem nægir fyrir 3 þingmönnum. Rétt yfir 5 prósenta þröskuldi fyrir jöfnunarþingsæti.

Sósíalistaflokkurinn er sem fyrr undir þröskuldinum, nú með 3,9 prósent og lækkar um hálft prósent á milli mánaða.

Evrópusinnar mælast með 32 menn

Samanlagt eru ríkisstjórnarflokkarnir þrír með aðeins 34,2 prósenta fylgi. Það myndi duga fyrir 22 þingmönnum, einum færri en í síðasta mánuði. Flokkarnir hafa 38 alþingismenn í dag.

Stjórnarandstaðan mælist með samanlagt 65,8 prósenta fylgi eða 41 þingsæti. Evrópusinnaðir flokkar, Samfylking, Píratar og Viðreisn mælast með meirihluta þingsæta, 32 talsins.

Könnunin var gerð 1. september til 1. október. Úrtakið var 11.005 og svarhlutfallið 48,5 prósent.