Rússneskir nemendur munu því læra að nota skotvopn og handsprengjur. Breska varnarmálaráðuneytið skýrir frá þessu og byggir á tilkynningum frá rússneska menntamálaráðuneytinu.
Hvað varðar háskólanema þá munu þeir hljóta einhverskonar grunnþjálfun fyrir hermenn og er ætlunin að sú kennsla hefjist í desember.
Breska varnarmálaráðuneytið segir að kennslan minni á það sem var á tímum Sovétríkjanna en þá var kennsla af þessu tagi skylda allt til 1993.
Danska ríkisútvarpið hefur eftir Flemming Splidsboel, sérfræðingi í rússneskum málefnum hjá Dansk Institut for Internationale Studier, að þetta sé kunnugleg sjón í rússneskum skólum. Hugmyndin sé sótt til þeirrar herþjálfunar sem var í skólum á tímum Sovétríkjanna.
Þegar Pútín komst til valda um aldamótin var aftur byrjað að bjóða upp á kennslu af þessu tagi í skólum en foreldrar réðu því hvort börnin þeirra fengju kennslu af þessu tagi. En nú verður þetta skyldunám og bætt verður við kennsluna.
„Maður fær kynslóð sem hefur hlotið þjálfun í meðferð vopna, hefur tekið þátt í taktískum æfingum og hefur skilning á hernaðarheiminum. Hluti þeirra mun kannski styðja hernaðarheiminn. Þetta er leið til að gera stríð eðlilegt,“ sagði Splidsboel.
Hann sagði einnig að þetta skref vitni um að ákveðin þróun eigi sér stað í Rússlandi þar sem hernaðarhyggja ræður ríkjum og þar með sé vilji til stríðsreksturs. Það sé verið að hervæða æskuna.
Hann sagðist ekki vilja ganga svo langt að segja að þetta þýði stigmögnun á stríðinu í Úkraínu en Rússland sé að færast í átt að „ofurættjarðarást“.
