Nýlega var þingfest í Héraðsdómi Reykjaness mál gegn manni sem héraðssaksóknari hefur ákært fyrir brot gegn barnaverndarlögum vegna atviks sem átti sér stað á heimili mannsins í desember árið 2019.

Maðurinn er sakaður um að hafa sýnt dreng „yfirgang og vanvirðandi og ruddalega háttsemi, er hann hljóp á eftir honum inn í svefnherbergi, læsti hurðinni, og gegn vilja hans snéri hann niður í hjónarúm herbergisins og þar bundið hann á höndum og fótum, fyrir aftan bak, sest klofvega yfir hann, þar sem hann lá á maganum og kitlað hann, þrátt fyrir að drengurinn bæði hann margsinnis um að hætta, en ákærði lét ekki af háttsemi sinni fyrr en drengurinn náði að snúa sér við og hrækja í andlit ákærða,“ eins og segir orðrétt í ákæru.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.

Fyrir hönd hins ólögráða barns er krafist miskabóta að fjárhæð ein milljón króna og má ætla af lestri ákæru að móðir drengsins geri þessa kröfu fyrir hönd hans.