DV greindi frá á föstudag að reynt hafi verið að brjótast inn á heimili í Litla-Skerjafirði í Reykjavík um fjöguleytið nóttina á undan. Innbrotsþjófarnir brutu húninn af svalahurð heimilisins en komu ekki inn í íbúðina heldur hlupu í burtu er þeir urðu varir við heimilisfólk sem vaknaði við atganginn.
Þeir stálu hins vegar gaskútnum af svölunum. Konan sem ræddi við DV þá hafði samband aftur um helgina og greindi frá því að gaskúturinn hefði endurheimst ásamt þýfi frá öðrum íbúum í nágrenninu. Þeir komust inn í fjölbýlishús í nágrenninu þar sem þeir brutust inn í geymslur og stálu eigum íbúa. Hins vegar fannst líklega megnið af því þýfi fyrir utan húsið, ásamt gaskútnum sem áður er um getið. Svo virðist sem þjófarnir hafi verið að safna þýfi er styggð kom að þeim og þeir flýðu vettvanginn. Íbúar endurheimtu mestallt eða allt þýfið.
„Löggan hafði ekki áhuga á að gera neitt,“ segir íbúi.
Mikið hefur verið um innbrot á höfuðborgarsvæðinu í sumar, m.a. í Hlíðahverfi og víðar.