Þann 6. mars árið 2015 hvarf hinn sautján ára gamli Rudolph „Rudy“ Farias IV skyndilega þegar hann var úti að ganga með hundana í borginni Houston í Texas-fylki í Bandaríkjunum. Rudy skilaði sér aldrei heim en annar hundurinn hans kom hlaupandi einn heim og hinn fannst á reiki í grennd við heimilið.

Óhætt að fullyrða að fjölskylda Rudy hafi nánast verið búin að gefa upp alla von. En kraftaverkin gerast enn. Á dögunum fannst meðvitundarlaus maður fyrir utan kirkju í sömu borg, alsettur marblettum og sárum. Frekar eftirgrennslan leiddi í ljós að Rudy var fundinn, átta árum eftir að hann hvarf.

CNN fjallar um málið, sem er allt hið dularfyllsta, en í frétt miðilsins kemur fram að móðir Rudy segi að hann sé í slæmu ástandi og hún óttist að hann hafi verið í haldi misyndismanna þennan tíma og hafi verið barinn og misnotaður. Segir móðir hans að Rudy geti aðeins mælt nokkur orð og vilji helst bara liggja í hnipri í sjúkrarúmi sínu á spítalanum. Telur hún að langur vegur sé þar til að sonur hennar geti mögulega náð fullri heilsu að nýju.

Á sínum tíma taldi lögreglan að Rudy hafi einfaldlega látið sig hverfa sjálfur og rannsakaði málið ekki sem sakamál. Fjölskylda hans var hins vegar á öðru máli og taldi útilokað að drengurinn hefði sjálfur ákveðið að flýja aðstæður sínar.

„Hann er með svo stórt hjarta og hann elskar alla skilyrðislaust. Þess vegna veit ég að hann yfirgaf okkur ekki,“ sagði móðir hans í viðtali við staðarmiðil þegar eitt ár var liðið frá hvarfinu.

Fjölskyldan réð einkaspæjara, Brendu Paradis, á eigin kostnað til þess að grennslast fyrir um hvarfið. „Þessi fjölskylda hefur mátt þola mikið. Hvað sem átti sér stað þá þarf móðir að fá svör um hvað henti sonar hennar,“ er haft eftir einkaspæjaranum þó ekki komi fram hvort að starf hennar hafi skilað árangri.