Húsið, sem selt var á nauðungarsölu í Reykjanesbæ árið 2022 og fjallað var um í fréttum í gær, hefur verið ítrekaður vettvangur fíkniefnasölu. Þetta kemur fram í dómi Héraðsdómi Reykjaness yfir eiganda hússins, Jakub Polkowski, sem féll í ágúst í fyrra en þar var hann úrskurðaður í tólf mánaða skilorðsbundið fangelsi fyrir fíkniefnasölu, peningaþvætti og brot á vopnalögum.
Óhætt er að segja að allt hafi farið á hliðina í gær þegar RÚV greindi frá því að hús við Hátún 1 í Reykjanesbæ hefði verið selt á nauðungarsölu fyrir aðeins þrjár milljónir króna. Eigandi hússins, áðurnefndur Jakub, hafði staðgreitt það á 44 milljónir króna árið 2018 fyrir peninga sem hann fékk vegna læknamistaka sem hann varð fyrir á barnsaldri og gerðu það að verkum að hann er öryrki í dag.
Jakub hefur búið í húsinu síðan ásamt foreldrum sínum og bróður. Í samtali við RÚV sagðist hann ekki hafa áttað sig á því að borga þyrfti ýmis gjöld af húsnæðinu, til að mynda tryggingar, heitt vatn og rafmagn en þegar skuldin var komin upp í 2,5 milljónir króna var húsið selt á nauðungarsölu og Jakub stóð uppi eignarslaus og gert að yfirgefa húsið fyrir vikulok.
Kaupendur hússins var fyrirtækið Sæstjarnan ehf., sem er í eigu feðganna Kristins Guðmundssonar og Jónasar Sigurðar Kristinssonar. Hefur það vakið mikla reiði að sýslumaðurinn á Suðurnesjum, Ásdís Ármannsdóttir, ekki nýtt sér heimild til að endurtaka nauðungaruppboð í ljósi þess að tilboðið sem barst frá feðgunum var langt undir markaðsvirði eignarinnar.
En málið á sér fleiri hliðar. Vísir birti í hádeginu viðtal við Friðjón Einarsson, formann bæjarráðs Reykjanesbæjar, þar sem hann sagði mál Jakubs vera flókið og að um fjölskylduharmleik sé að ræða.Sagði hann sýslumann hafa verið í erfiðri og flókinni stöðu og að þingmenn, sem gagnrýnt hafa vinnubrögð hennar harðlega, ættu að líta sér nær.
Samkvæmt heimildum DV hefur lögreglan verið tíður gestur á heimilinu vegna fíkniefnasölu og það er staðfest í skilorðsbundna fangelsisdóminum yfir Jakubi. Þá hafi nágrannar upplifað mikið ónæði vegna umgangs og tíðra gestakoma.
Í honum kemur fram að á um 16 mánaðatímabili árstímabili árin 2020 og 2021 hafi lögreglan átta sinnum haft afskipti af Jakub á heimili hans og lagt hald á fíkniefni sem ætluð voru til sölu og dreifingar og í sumum tilvikum hafi ungmenni verið fyrir á staðnum. Þá var lagt hald á ýmis vopn á heimili hans
Játaði Jakub brot sín skýlaust fyrir dómi ef undan er skilin ákæruliður um peningaþvætti þar sem lögreglan hafði rannsakað bankareikning hans og komist að því að um 4,4 milljónir höfðu borist þangað með óútskýrðum hætti. Játaði Jakub síðar að um ágóða af sölu fíkniefna var að ræða.
Niðurstaðan var sú að Jakub var dæmdur í skilorðsbundið 12 mánaða fangelsi til tveggja ára fyrir fíkniefnasölu, peningaþvætti og brot á vopnalögum. Þá var honum gert að sæta upptöku á 1,07 grömmum af kókaíni, 10,88 grömmum af amfetamíni, 7,66 grömmum af MDMA, 172,65 grömmum af maríhúana, 4,77 grömmum af tóbaksblönduðum kannabisefnum, 12,36 grömmum af kannabisblönduðu efni, fimm töflum af rítalini, fimm töflum af concerta, tólf töflum af stesolid, vog, filterum, smelluláspokum og plastrúllu.
