Sjónvarpsstöðin CNN segir frá því í dag að kona búsett í New York borg hafi verið ákærð fyrir sjö hatursglæpi sem allir hafa beinst að fólki af asískum uppruna.
Glæpirnir eru sagðar fela í sér líkamsárásir og áreitni. Sú ákærða heitir Camila Rodriguez og er 29 ára gömul.
Rodriguez er sökuð um að hafa í einu tilfelli togað í hár konu af asískum uppruna og slegið hana í andlitið eftir að konan talaði við hana á kínversku. Veitti Rodriguez í kjölfarið konunni fleiri högg og þá með krepptum hnefa.
Í öðru tilfelli er Rodriguez sökuð um að toga í hár manneskju sem beið ásamt tveimur vinum sínum, eftir borði, fyrir utan veitingastað. Allir þrír vinirnir eru af kínverskum uppruna. Annar vina manneskjunnar sem varð fyrir hártoginu ýtti Rodriguez í burtu en hún er sökuð um að hafa þá skellt rafmagnsvespu sinni utan í fótlegg viðkomandi.
Rodriguez er sökuð um að hafa reynt að ráðast á þjónustustúlku á þessum sama veitingastað þegar hún kom út til að tilkynna vinunum þremur að borðið þeirra væri tilbúið. Sami einstaklingur sem ýtti henni frá vini sínum ýtti henni þá aftur og er hún sökuð um að hafa slegið hann í kjölfarið.
Í öðrum tilfellum er hún sökuð um að hafa togað í hár konu af filippeyskum uppruna og kýlt hana margsinnis í andlitið, sparkað í fætur konu af kóreskum uppruna, hrækt á karlmann af kínverskum uppruna og að slá karlmann af kóreskum uppruna.