Hafdís Björg Kristjánsdóttir, eigandi líkamsmeðferðarstofunnar Virago og einkaþjálfari, þarf að greiða 10 milljónir króna auk dráttarvaxta, vegna kaupa á fyrirtækinu Trimmform Berglindar. Dómur í málinu var kveðinn upp í Héraðsdómi Reykjavíkur 19. október 2022, en Smartland vakti athygli á honum í dag.
Í ágúst 2019 keypti Hafdís Björg Trimmform Berglindar. Umsamið var að hún myndi greiða 12 milljónir króna fyrir fyrirtækið ásamt því að taka húsnæðið undir reksturinn á leigu sem er við Faxafen 14 í Reykjavík. Fyrrverandi eigendur Trimmforms Berglindar, Björn Konráð Magnússon og Guðrún Jónsdóttir, stefndu Hafdísi Björgu þegar ljóst var að hún myndi ekki greiða þeim umsamda upphæð fyrir fyrirtækið.
Hafdís Björg fékk fyrirtækið afhent 1. september 2019, og 13. september 2019 greiddi hún 2 milljónir króna inn á reikning Guðrúnar. Afgangurinn, 10 milljónir króna, hefur ekki fengist greiddur.
Hafdís Björg bar því við að hluti tækjanna hafi ekki verið nothæfur, þegar hún fékk þau afhent. Hún hafi gert athugasemdir fljótlega eftir afhendingu, en stefnendur brugðist illa við þeim athugasemdum. Jafnframt hafi hún hvorki fengið að yfirtaka leigusamninginn né heldur hafi tekist að ná samningi við leigusalann innan umsamins tímaramma. Dómari taldi að Hafdísi Björgu hefði ekki tekist að sýna fram á hið selda hefði verið haldið slíkum göllum að henni hafi verið heimilt að halda eftir greiðslu eða rifta kaupunum.
Í dómnum kemur fram að Hafdísi Björgu sé skylt að greiða 10 milljón krónur vegna kaupa á rekstri, tækjum og vörumerki, með dráttarvöxtum frá 24. október 2019 til greiðsludags, samkvæmt 1.mgr. 6. gr. laga nr. 38/2001, um vexti og verðtryggingu. Auk þess þarf Hafdís Björg að greiða 1.116.000 króna í málskostnað til stefnenda.
