Mennirnir tveir sem eru í haldi lögreglu vegna mannsláts sem átti sér stað á Selfossi síðastliðin fimmtudag eru stjúpbræður. Þetta herma heimildir DV. Sá eldri þeirra er 25 ára gamall, fæddur árið 1998, en sá yngri er fæddur ári síðar en hann hefur áður komist í kast við lögin.

Sumarið 2022 var hann dæmdur í sex mánaða fangelsi og sviptur ökurétti ævilangt fyrir ýmis brot meðal annars tvær líkamsárásir, akstur undir áhrifum sem og hótanir og tilraun til þess að ráðast á lögreglumann á vakt.

Lögregla hefur varist allra frétta af málinu en fyrir liggur krafa lögreglu um að mennirnir sæti vikulöngu gæsluvarðhaldi vegna rannsóknarinnar. Dómari í málinu ákvað í gær að nýta sér sólarhringsfrest til að kveða upp úrskurðinn og má búast við honum í dag.

Hermt er að andlátið tengist ofskömmtun fíkniefna en lögregla hefur ekkert látið uppi um þann þátt. Sú sem lést er á þrítugsaldri en ekki liggur fyrir hvernig hún tengdist bræðrunum.

Háværar sögusagnir eru á kreiki varðandi atburðinn og vakti athygli á samfélagsmiðlum í gær að ung stúlka sá sig knúna til þess að greina frá því að hún væri á lífi og tengdist málinu ekki með nokkrum hætti.