Veitingastaðurinn Fishhouse í Grindavík, starfsmaður staðarins og Sjóvá-Almennar eru skaðabótaskyld vegna líkamstjóns karlmanns sem varð fyrir líkamsárás starfsmannsins á staðnum 14. júlí 2019. Stefndu,skulu jafnframt greiða stefnanda óskipt 1,5 milljón í málskostnað. Kemur þetta fram í dómi héraðsdóms Reykjavíkur sem kveðinn var upp 18. apríl síðastliðinn.
Hnefahögg við barborðið
Tildrög málsins eru þau að stefnandi var aðfararnótt 14. júlí 2019 við barborð veitingastaðarins, er starfsmaðurinn, sem sinnti afgreiðslu á bar staðarins, sló til hans með krepptum hnefa vinstri handar einu höggi í andlitið svo stefnandi féll aftur fyrir sig og skall með höfuðið í gólfið. Rotaðist hann í nokkrar mínútur og fékk stóra kúlu aftan á hnakka, og var hann fluttur með sjúkrabíl á Heilbrigðisstofnun Suðurnesja (HSS). Kemur fram í dómi að stefnandi væri með slæman höfuðverk, jafnvægisleysi, þvoglumælgi, minnisleysi og ætti erfitt með gang. Leitaði hann tvisvar eftir þetta til HSS, en eftir höfuðhöggið var hann með viðvarandi svima sem háir honum við vinnu sem og heyrnarskerðingu á hægra eyra. Í læknisvottorði kemur fram að hann sé með heyrnarskerðingu á báðum eyrum, mun verri á því hægra og þurfi hann heyrnartæki á það eyra.
30 daga dómur fyrir líkamsárás
Þann 15. ágúst sama ár lagði stefnandi fram kæru hjá lögreglunni á Suðurnesjum á hendur starfsmanninum. Í kærunni kom fram að stefnandi hefði verið að skemmta sér á staðnum og hafi drukkið töluvert mikið af áfengi. Hann hafi mætt á veitingastaðinn milli klukkan 1 og 2 um nóttina, farið á barinn og verið ókurteis við barþjóninn sem hafi kýlt hann. Barþjóninn lýsti hins vegar málavöxtum svo að stefnandi hefði kýlt hann fyrst með krepptum hnefa beint framan á andlitið, í nef og framtennur, hann hafi fengið blóðnasir og brotnað hafi upp úr vinstri framtönn. Hafi hann síðan slegið stefnanda til baka, með fyrrgreindum afleiðingum.
Með dómi Héraðsdóms Reykjaness 26. mars 2021 hlaut starfsmaðurinn 30 daga fangelsi fyrir líkamsárásina, skilorðsbundið til tveggja ára, auk þess sem hann var dæmdur til að greiða þolanda 350.000 kr. Í bætur auk sjúkrakostnaðar upp á tæpar 200.000 kr.
Ábyrgð á grundvelli vinnuveitenda- og húsbóndaábyrgðar
Stefnandi byggði kröfur sínar í þessu máli gegn veitingastaðnum og tryggingafélaginu á því að hann hafi orðið fyrir varanlegu líkamlegu tjóni og beri veitingastaðurinn ábyrgð á grundvelli vinnuveitenda- og húsbóndaábyrgðar á því tjóni sem starfsmaðurinn hafi valdið. Taldi hann jafnframt að félagið sem er eigandi staðarins eigi sök á líkamstjóni hans með því að hafa vanrækt að tryggja að starfsemi staðarins sé rekin í samræmi við opinberar kröfur og skyldur. Beri því tryggingafélagið einnig ábyrgð á skaðabótaskyldri háttsemi þess sem óumdeildur ábyrgðartryggjandi veitingastaðarins.
Taldi stefnandi fyrirtækið ekki hafa fullnægt opinberum skilyrðum til að sinna dyravörslu og auk þess hafa vanrækt að að tryggja að til staðar væri hæft starfsfólk sem hlotið hefði tilskylda þjálfun til að meðhöndla stefnanda og koma þannig í veg fyrir tjón hans. En með fullnægjandi tökum hefði verið fært að vísa honum út af staðnum slysalaust og koma þannig í veg fyrir líkamstjón hans.
Stefnandi byggði kröfu sína gegn starfsmanninum á því að hann hafi með saknæmum og ólögmtum hætti valdið sér tímabundnu og varanlegu líkamstjóni. Hann hefði þegar gengist við verknaðinu fyrir dómi og verið dæmdur fyrir.
Töldu málatilbúnað stefnanda fráleitan
Stefndu, fyrirsvarsmenn veitingastaðarins, báru því við að ljóst sé að í starfslýsingu starfsmannsins hafi ekki falist að beita viðskiptavini líkamlegu valdi, ofbeldi eða viðlíka valdbeitingu. Var því mótmælt að dyravarsla hafi verið hluti af starfi hans umrædda nótt. Málatilbúnaður stefnanda sé fráleitur þar sem hann hafi sjálfur lýst því yfir að hann sé meðvitaður um að hafa tilhneigingu til að verða erfiður er hann drekki mikið, hann hafi ráðist að fyrra bragði á barþjóninn og stefnandi beri ábyrgð á sjálfum sér og gjörðum sínum. Þó talið yrði að staðurinn bæri einhverja skaðabótaábyrgð á tjóni stefnanda sé ljóst að eigin sök hans sé svo veruleg að hann verði að bera allt sitt tjón sjálfur.
Eigi að síður var það mat dómara að þótt líkamsárás starfsmannsins gegn stefnanda geti ekki talist eðlileg háttsemi við afgreiðslu á veitingahúsi þá hafi framferði hans þó verið í slíkum tengslum við starf hans að felld verður ábyrgð á vinnuveitandann, Fishhouse ehf. vegna umrædds tjóns stefnanda. Sjóvá-Almennar ber sömuleiðis bótaábyrgð sem vátryggjandi fyrirtækisins.
Var það jafnframt mat dómara að stefnandi gæti ekki, þrátt fyrir atlögu hans, ölvun og framkomu, verið látinn bera nokkra eigin sök á líkamsárás stefnda gagnvart honum og afleiðingum hennar.
