Rannsókn er lokið á bruna sem varð á Tálknafirði þann 23. febrúar síðastliðinn, þegar eldur kviknaði í nýbyggingu  fiskeldisfyrirtækisins Arctic Smolt hf. í botni Tálknafjarðar.

Eldurinn er rakinn til notkunar iðnaðarmanna á staðnum á gasi og opnum eldi, er þeir voru að vinna við að þétta steypta veggi. Í tilkynningu frá Lögreglunni á Vestfjörðum um þetta segir:

„Lögreglan á Vestfjörðum hefur haft málið til rannsóknar og telst það nú upplýst. Rannsóknardeild lögreglunnar á Vestfjörðum naut aðstoðar tæknideildar lögreglunnar á höfuðborgarsvæðinu við rannsóknina.

Iðnaðarmenn voru við vinnu í byggingunni þar sem þeir voru að vinna við að þétta steypta veggi. Til þess notuðu þeir m.a. gas og opinn eld. Ljóst þykir að glóð hafi borist frá opna eldinum í plastteninga sem þarna voru ekki langt frá.

Plastteningarnir reyndust innihalda mjög eldfimt efni og varð mjög fljótt mikill eldur laus í byggingunni og báru tilraunir starfsmanna til að slökkva eldinn ekki árangur.

Enginn var með réttarstöðu sakbornings við rannsókn málsins.

Eins og segir hér að ofan telst málið upplýst og er unnið að frágangi þess hjá lögreglunni á Vestfjörðum. Eigendum og tryggingafélagi hefur verið gert kunnugt um niðurstöðuna.“