„Ég hef haft von um að það sé til eitthvert réttlæti í þessu samfélagi,“ sagði Sólveig Anna Jónsdóttir, formaður Eflingar, við fjölmiðla í kjölfar örlagaþrungins úrskurðar Héraðsdóms Reykjavíkur í dag. Héraðsdómur hefur úrskurðað að Eflingu beri að láta af hendi félagatal sitt í hendur Ríkissáttasemjara. Sá síðarnefndi fór með málið fyrir héraðsdóm eftir að hafa ítrekað kallað eftir félagaskrám Eflingar svo hægt sé að efna til atkvæðagreiðslu í félaginu um miðlunartillögu Ríkissáttasemjara í deilu Eflingar og Samtaka atvinnulífsins (SA).
Ennfremur kemur fram í úrskurðinum að réttaráhrif hans frestast ekki þó að Efling áfrýji úrskurðinum til Landsréttar eins og félagið hefur lýst yfir að verði gert, yrði þeim gert skylt að afhenda skrána. Þetta þýðir að Eflingu ber að afhenda félagaskrána þegar í stað.
Aðalsteinn Leifsson ríkissáttasemjari var ekki viðstaddur uppkvaðningu úrskurðarins en Sólveig Annar Jónsdóttir og Viðar Þorsteinsson, dagskrárstjóri Eflingar, voru viðstödd. Sólveigu virtist mjög brugðið við niðurstöðuna en hún sagðist ennþá hafa trú á að réttlæti væri að finna í samfélaginu. Sú von færi þó dofnandi.
Anton Brink tók meðfylgjandi myndir úr Héraðsdómi Reykjavíkur.
Það er skammt stórra högga á milli hjá forystu Eflingar því klukkan hálfþrjú í dag úrskurðar Félagsdómur um lögmæti boðaðra verkfalla félagsins en SA hefur kært verkfallsboðunina til Félagsdóms.
Uppfært: Úrskurður Félagsdóms var Eflingu í vil. Verkfallsboðanirnar eru löglegar.
