Stjórnmálamenn bregðast við kröfum kjósenda og lofa að fjölga lögreglumönnum en samt sem áður tekst ekki að nýta öll plássin í lögreglunáminu og sumir þeirra sem það stunda eru óhæfir sem lögreglumenn að mati reyndra lögreglumanna. Sumir eru sagðir hafa svo takmarkaða sænskukunnáttu að þeir geti ekki skrifað einfaldar skýrslu.
Þetta kemur fram í 200 sekunder sem er fréttaskýringaþáttur Aftonbladet.
Í þættinum er haft eftir Johan Siverland, sem hefur kennt við lögregluskólann í eitt ár og hefur verið lögreglumaður í 17 ár, að nú sé fjöldi lögreglunema markmiðið, ekki gæðin. Hann nefndi síðan nokkur dæmi sem hann hefur sjálfur upplifað í starfi sínu sem lögreglumaður.
Þar á meðal var að lögreglunemi ók á fótgangandi vegfaranda við lögregluskólann. Í stað þess að biðjast afsökunar og kanna hvernig vegfarandinn hefði það skammaði neminn hann og ók síðan á brott.
Lögreglunemi fékk spurningu í skriflegu prófi sem hljóðaði: „Hvernig áttu að taka á þessum þremur grunuðu ungmennum?“ Svarið var: „Ég handtek hóruungana.“
Lögreglunemi skaut kennara á æfingu. Kennarinn lék hlutverk ölvaðs manns sem hótaði að slá frá sér með áfengisflösku. Lögregluneminn sagði að áfengisflaskan væri lífshættulegt vopn og að þess vegna hafi verið réttlætanlegt að skjóta.
Einnig sagði hann að lögreglunemar hafa ekki kunnað að dæla bensíni á bíla. Þeir hafi dælt bensíni í rúðuvökvahólfið. Einnig séu dæmi um að þeir hafi ekki getað opnað vélarhlífina á innan við tíu mínútum.
