Margir Úkraínumenn reyna þessa dagana að komast frá þeim svæðum í Úkraínu sem eru á valdi Rússa. Leppstjórnirnar á þessum svæðum segja að íbúar þeirra hafi samþykkt með miklum meirihluta í atkvæðagreiðslu að óska eftir að svæðin verði innlimuð í Rússland.

Þegar það verður gert, sem verður væntanlega á næstu dögum, munu karlmenn, sem búa á þessum svæðum, verða skyldugir til að gegna herskyldu í rússneska hernum. Margir þeirra óttast einmitt að þeir verði neyddir til að berjast með Rússum gegn löndum sínum og reyna því að sleppa frá þessum svæðum.

BBC segir að í nokkrum bæjum í Kherson séu rússneskir hermenn byrjaðir að ganga hús úr húsi til að skrá niður nöfn karlmanna sem í þeim búa. Segja íbúarnir að hermennirnir hafi sagt karlmönnunum að vera undir það búnir að verða kallaðir til herþjónustu.